Ystadegau ac ymchwil: rhannu data at ddibenion ystadegau ac ymchwil

Caiff y cofnod hwn o drefniadau cymeradwy ar gyfer gweld ddata ei ddiweddaru’n rheolaidd i sicrhau tryloywder ynghylch rhannu data at ddibenion ystadegau ac ymchwil.

Mae ein datganiad ar gyfrinachedd a gweld ddata yn amlinellu sut rydym yn cadw’n ddiogel y data a ddefnyddiwn fel sail ar gyfer ystadegau swyddogol ac ymchwil, gan barchu hawliau unigolion i breifatrwydd.

Mae’r datganiad hefyd yn egluro bod cyfrinachedd a diogelu data personol yn flaenoriaeth bendant. Rydym hefyd eisiau manteisio i’r eithaf ar werth data er lles y cyhoedd, ac mae’n bosibl y byddwn yn rhannu data at ddibenion penodol a phriodol yn ymwneud ag ystadegau ac ymchwil.

Mae’r broses rhannu data yn destun proses gymeradwyo lem sy’n:

• asesu diben y prosiect
• sicrhau bod sail gyfreithiol dros rannu data,
• ystyried a oes unrhyw oblygiadau moesegol
• sicrhau y bydd mesurau diogelwch priodol ar waith mewn perthynas â’r data.

Byddwn yn sicrhau bod cyn lleied o ddata â phosibl yn cael eu darparu. Oni bai ei bod yn wirioneddol angenrheidiol, ni chaiff data personol eu rhannu o gwbl, neu byddwn yn rhoi mynediad at ddata anhysbys drwy amgylchedd ymchwil diogel priodol. Byddwn ond yn rhannu data personol adnabyddadwy pan fo hynny’n gyfreithlon a bod diben penodol dros wneud hynny.

Pan gaiff data eu rhannu, sefydlir cytundeb mynediad data rhwng Llywodraeth Cymru a’r sefydliad sy’n derbyn. Mae’r cytundeb yn amlinellu sut y gellid defnyddio’r data, ac am ba hyd y gellid eu storio. Ar ôl y cyfnod hwn, rhaid dileu’r data.

Mae Llywodraeth Cymru wedi ymrwymo i drin eich data personol yn saff ac yn ddiogel, a dim ond cyhyd ag y mae angen inni wneud hynny.   

Os oes gennych chi unrhyw bryderon ynglŷn â'r ffordd rydym yn defnyddio eich data personol, y peth gorau fyddai ichi eu codi â’r tîm perthnasol i ddechrau.   

Gallwch hefyd gysylltu â'r Swyddog Diogelu Data drwy e-bostio SwyddogDiogeluData@llyw.cymru neu drwy anfon llythyr i’r cyfeiriad isod:  

Llywodraeth Cymru
Parc Cathays 
Caerdydd  
CF10 3NQ 

Os hoffech wneud cwyn ffurfiol am y ffordd y mae Llywodraeth Cymru wedi prosesu eich data personol, gallwch ddilyn y canllawiau ar y dudalen Cwyn am Lywodraeth Cymru. 

Byddwn yn cydnabod eich cwyn ac yn ymateb o fewn amserlen briodol, yn unol â deddfwriaeth diogelu data a'n proses gwyno.