Straeon pobl go iawn am Nyth: Mrs Brown o Bowys

Mae Mrs Brown yn byw gyda heriau hirdymor sy'n gysylltiedig ag iechyd ac anabledd, a bu effaith fawr arnyn nhw pan stopiodd ei boeler weithio.

Dechreuodd problemau ar ôl gosod ystafell ymolchi ar y llawr gwaelod yn ei thŷ sengl, a achosodd broblemau i'w system wresogi a dŵr poeth, gyda'r gweithiwr, yn y pen draw, yn gwrthod dod yn ôl. Roedd hyn yn gadael Mrs Brown gyda boeler annibynadwy am dros flwyddyn.

Roedd y sefyllfa'n golygu canlyniadau difrifol i iechyd, yn enwedig pan ddatblygodd Mrs Brown niwmonia dros fisoedd y gaeaf. Wrth siarad â gweithwyr gofal iechyd proffesiynol, cafodd ei theulu eu cyfeirio at y gwasanaethau cymorth sydd ar gael.

Darparu cymorth hanfodol

Ar ôl cysylltu â Gofal a Thrwsio Cymru, elusen sy'n helpu pobl hŷn i ddal i fyw'n annibynnol gartref, cafodd Mrs Brown ei chyfeirio at Nyth. 

Roedd proses ymgeisio’r cynllun yn cynnig eglurder, strwythur a sicrwydd, gan helpu i leddfu’r straen roedd Mrs Brown wedi bod yn ei phrofi. 

Rhoddodd Gofal a Thrwsio gefnogaeth i Mrs Brown a'i theulu drwy gydol y broses gyfan, gan gynnig arweiniad ymarferol ac eiriolaeth.

Beth yw Nyth?

Mae cynllun Nyth yn cynnig cyngor arbed ynni diduedd am ddim i gartrefi Cymru. Gall y cynllun hefyd ddarparu cymorth gyda gwelliannau ynni cartref, gan gynnwys inswleiddio a phaneli solar. 

Os yw eich cartref heb wres neu heb ddŵr poeth, efallai y byddwch yn gymwys i gael trwsio'ch boeler neu i gael boeler newydd, heb ddim cost i chi.

Ers 2011, mae'r cynllun wedi gosod dros 60,000 o welliannau mewn cartrefi.

Creu cartref cynnes a diogel 

Drwy gynllun Nyth, roedd Mrs Brown yn gymwys i gael boeler newydd a rheiddiaduron newydd, a osodwyd drwy'r eiddo, heb ddim cost iddi hi. 

Er enghraifft, yn ôl yr Ymddiriedolaeth Arbed Ynni, mae cost cael boeler gradd A newydd a rhaglennydd, thermostat ystafell a falfiau rheiddiadur thermostatig yn lle hen foeler nwy gradd G, yn £3,700; ond byddai cael rheiddiaduron newydd hefyd yn costio mwy eto.

Mae'r mesurau hyn wedi cael effaith ar lesiant Mrs Brown sydd wedi newid ei bywyd, gan roi cartref cynnes a diogel iddi a thawelwch meddwl sylweddol.   

Disgrifiodd merch Mrs Brown y gefnogaeth fel “bendith” oedd wedi helpu i leihau caledi ac adfer ymdeimlad o sefydlogrwydd.

"Roedd yn fendith i ni. Ar ôl bod mor hir heb wres na dŵr poeth dibynadwy, mae cael cartref cynnes unwaith eto wedi rhoi tawelwch meddwl go iawn i ni."

"Dyden ni'n dal ddim wedi dod i arfer efo'r syniad o fod â gwres a dŵr poeth dibynadwy eto. Mae hyn wedi gwneud cymaint o wahaniaeth i'n bywydau ni."