Y newyddion diweddaraf am ein gwasanaethau a’n canllawiau Treth Trafodiadau Tir (TTT) ar gyfer gweithwyr proffesiynol treth.
Taliadau Treth Trafodiadau Tir
Pan fyddwch yn gwneud taliad Treth Trafodiadau Tir, mae'n bwysig bod cyfeirnod unigryw y trafodiad (CUT/UTRN) 12 digid yn cael ei ddefnyddio fel cyfeirnod talu’r banc.
Peidiwch ag:
- ychwanegu unrhyw fylchau rhwng y 12 digid
- ychwanegu'r llythrennau 'CUT/UTRN' neu unrhyw nodau eraill
Efallai y bydd eich taliad yn cael ei oedi os nad yw'r cyfeirnod talu’r banc (y CUT/UTRN) yn cyfateb yn union i'r CUT/UTRN ar eich ffurflen dreth TTT.
Cwestiwn cyfradd uwch newydd yn y ffurflen Treth Trafodiadau Tir (TTT)
O 28 Mehefin 2023, bydd cwestiwn cyfradd uwch newydd yn y ffurflen TTT. Dim ond os ydych chi'n ffeilio trafodiad cyfradd uwch y bydd angen i chi gwblhau'r cwestiwn hwn.
Os byddwch yn cyflwyno ffurflen treth uwch cyn 28 Mehefin, nid oes angen i chi ateb y cwestiwn newydd. Os byddwch yn dechrau ffurflen treth uwch cyn 28 Mehefin, ond yn ei chyflwyno ar ôl 28 Mehefin, bydd angen ymateb i'r cwestiwn newydd cyn y gellir cyflwyno'r ffurflen.
Os ydych angen help i gwblhau'r ffurflen dreth, gweler ein canllawiau TTT wedi’u diweddaru neu cysylltwch â ni.
Ffurflenni Treth Trafodiadau Tir (TTT) papur
O 3 Gorffennaf 2023, dim ond ar-lein y byddwch yn gallu ffeilio ffurflenni TTT. Ni fyddwn yn derbyn ffurflenni papur gan asiantau / trawsgludwyr wedi hynny.
I ffeilio ar-lein, bydd angen i chi gofrestru, caniatewch hyd at bythefnos i gwblhau'r broses.
Rydym wedi gwneud y newid hwn oherwydd bod ffurflenni wedi'u ffeilio ar-lein:
- yn gyflym i'w cwblhau, ac rydych yn cael cadarnhad ar unwaith
- yn defnyddio porth diogel sy'n lleihau'r siawns ohonynt yn cael eu colli neu eu dwyn
- yn rhoi gwell gwerth am arian drwy leihau’r costau gweinyddu
Os oes gennych unrhyw ymholiadau ynglŷn â sut i ffeilio neu gofrestru ar-lein, cysylltwch â ni os gwelwch yn dda.
Mae ein cyfeiriad Blwch Post wedi newid
Ar 3 Ebrill 2023, newidiodd ein cyfeiriad post i:
Awdurdod Cyllid Cymru, Blwch Postio 108, Merthyr Tudful, CF47 7DL
Rydym yn argymell defnyddio ein ffurflen gyswllt ar-lein i anfon gohebiaeth atom. Os oes gennych unrhyw gwestiynau, cysylltwch â ni.
Cyfrifo rhyddhad anheddau lluosog
Rydym yn cynnal ymchwil defnyddwyr ynglŷn â sut mae ein cwsmeriaid yn cyfrifo rhyddhad anheddau lluosog (MDR).
Os ydych chi'n ffeilio trafodiadau sydd â hawl i MDR, byddem wir yn gwerthfawrogi pe gallech gymryd 5-10 munud i gwblhau ein harolwg byr am gyfrifo rhyddhad anheddau lluosog.
Mae hwn yn gyfle i chi ddweud wrthym beth yw eich barn er mwyn sicrhau bod ein gwasanaethau mor hawdd â phosibl i’w defnyddio.
Diolch am eich cydweithrediad, rydym yn gwerthfawrogi eich cymorth.