Caniateir gwasgaru slyri neu dail organig arall sydd â chyfran uchel o nitrogen ar gael yn rhwydd, ac eithrio tail dofednod, rhwng 15 Hydref a 15 Tachwedd 2026.
Cynnwys
Cyflwyniad
Fe wnaeth y cyfnodau o sychder eithafol yr haf hwn leihau twf glaswellt. Mae hyn wedi effeithio ar y gallu i:
- wasgaru slyri yn briodol
- leihau'r cyfeintiau mewn storfeydd slyri cyn yr hydref a'r 'cyfnodau gwaharddedig'
Mewn ymateb i'r amgylchiadau hyn, caniateir gwasgaru slyri neu dail organig arall sydd â chyfran uchel o nitrogen ar gael yn rhwydd, ac eithrio tail dofednod, rhwng 15 Hydref a 15 Tachwedd 2026. Mae hyn yn berthnasol i bob math o bridd a chnwd.
Y gofynion ar gyfer gwasgaru slyri rhwng 15 Hydref a 15 Tachwedd
Er mwyn lleihau'r risg o lygredd yn ystod y cyfnod hwn, mae amodau ychwanegol yn gymwys.
Rhaid i chi:
- beidio â gwasgaru mwy na 30 metr ciwbig yr hectar (tua 2,670 galwyn yr erw)
- sicrhau bwlch o 3 wythnos o leiaf rhwng pob gwasgariad
Cyn gwasgaru
Nodwch. Mae gofynion presennol y Rheoliadau Rheoli Llygredd Amaethyddol yn dal i fod yn berthnasol ac mae'n rhaid eu hystyried.
Pryd bynnag y byddwch yn gwasgaru tail organig, gan gynnwys slyri, rhaid i chi wneud hynny mewn modd sy'n:
- lleihau'r risg o lygredd, ac
- cydymffurfio â holl ofynion eraill y Rheoliadau Rheoli Llygredd Amaethyddol
Mae'r rhain yn cynnwys:
Cynllunio'r broses o wasgaru tail
Cyn dechrau gwasgaru unrhyw wrtaith sy'n cynnwys nitrogen, rhaid i chi ystyried:
- anghenion y cnwd, ac
- os oes gan y cnwd anghenion o ran y deunydd sy'n cael ei ddefnyddio
Dylid cynnwys hyn fel rhan o'ch cynllun rheoli maethynnau presennol. Dylech ystyried y terfynau nitrogen a nodir yn y rheoliadau. I gael rhagor o wybodaeth am hyn, gweler prif ganllawiau'r Rheoliadau Rheoli Llygredd Amaethyddol.
Gwasgaru mewn amodau addas
Rhaid i chi gynnal archwiliad o'r cae ar yr adeg yr ydych yn bwriadu gwasgaru. Mae hyn i ystyried y risg o bydd nitrogen yn mynd i mewn i ddŵr wyneb. Dylech nodi yn benodol:
- goleddf y tir, yn enwedig os yw’r goleddf yn fwy na 12°
- unrhyw orchudd daear
- pa mor agos y mae'r tir at ddŵr wyneb, nentydd neu afonydd
- y tywydd
- y math o bridd, a
- phresenoldeb draeniau tir
Rhaid i chi beidio â gwasgaru os:
- daw risg sylweddol i'r amlwg
- yw’r pridd yn ddwrlawn
- yw’r pridd dan ddŵr,
- yw’r pridd wedi ei orchuddio ag eira
- yw’r pridd wedi rhewi
- oedd y pridd wedi rhewi am fwy na 12 awr yn ystod y 24 awr flaenorol