Llwybr Coedwig Cymru: Nant y Moel i Bont Walby

Nant y Moel i Bont Walby

Mwynhewch olygfeydd panoramig eang cyn cychwyn i ardal fwyaf coediog y llwybr.

Hyd y llwybr

28.9 km

Safleoedd Coedwig Genedlaethol ar hyd y llwybr hwn

Coedwig Ogwr (Nant y Moel)
Ffin Parc Coedwig Afan (Blaengwynfi) ac yn gyfagos i floc Cwm Saerbren
Glyncorrwg (Coedwig Cymer)

Llwybr

Mae’r adran hon yn cynnwys rhannau sy’n fwy heriol, oherwydd yr esgyniad, ond cewch eich gwobrwyo gyda golygfeydd hyfryd o Goedwig Ogwr. Wrth adael Nant y Moel a mynd i gyfeiriad y coetir, mae angen dringo ychydig er mwyn cyrraedd llwyfandir Carn yr hyrddod/Tarren y Fforch. O'r pwynt hwn fe welwch olygfa eang o Dde Cymru a chyn belled â De Orllewin Lloegr.

Yna mae'r llwybr yn mynd tua’r gogledd gan ddilyn y rhwydwaith llwybrau troed heibio'r Ffermydd Gwynt i Barc Coedwig Afan.

Wrth groesi'r A4107 mae'r llwybr yn parhau oddi ar y ffordd gan ddilyn ffyrdd coedwig llydan am 18km. Mae'r llwybr yn teithio ochr yn ochr ag ardaloedd coedwig Cwm Saerbren a Pharc Coedwig Afan, yna i mewn i Floc Coedwig Glyncorrwg.

Gan barhau drwy Glyncorrwg (Coedwig Cymer) byddwch yn mynd heibio i Fferm Wynt Pen-y-cymoedd.

Yna mae'r llwybr yn ymuno â Rhwydwaith Beicio Cenedlaethol 47 am 3.5km. Mae'r llwybr yn gadael bloc coedwig enfawr a reolir gan Cyfoeth Naturiol Cymru, i'r gogledd o Lyn Fawr. O Gwm Hwnt byddwch yn dilyn llwybrau troed ar hyd Cwm Gwrelych trwy goetiroedd llydanddail, ardal sydd wedi’i dynodi’n Safle o Ddiddordeb Gwyddonol Arbennig oherwydd ei nodweddion daearegol. Dysgwch fwy am hyn ar hyd y ffordd wrth i chi ddilyn rhan o Geo-lwybr Cwm Gwrelych.

Mae’r llwybr yn gorffen ger traphont Pont Walby ychydig i’r de o dref Glyn-nedd, lle gallwch gael mynediad at amwynderau lleol a maes parcio. Mae'r draphont yn rhestredig Gradd II. Cafodd ei dylunio gan Brunel a’i hadeiladu ar ddiwedd y 19eg ganrif.

Map o’r llwybr

Efallai na fydd y map yn hygyrch i bob defnyddiwr. Os oes angen fersiwn fwy hygyrch o’r map hon arnoch, e-bostiwch digidol@llyw.cymru.

Allwedd y map

Ni fydd eitemau sydd wedi'u marcio â seren* yn weladwy nes eu bod wedi'u chwyddo i mewn ar y map.

Llwybr Coedwig Cymru

Image	Nant y Moel i Bont Walby	Image	Coedwig Genedlaethol i Gymru
Image	Llwybr Coedwig Cymru: dechrau / diwedd adran

Teithio

Image	Maes parcio	Image	Safle Bws / Coets
Image	Gorsaf Drenau	Image	Terfynell Fferi
Image	Ardal Awyrennau

Cyfleusterau

Image	Toiled Cyhoeddus	Image	Tafarn / Bwyty*
Image	Caffi*	Image	Gwesty / Lletya / Tŷ Llety*
Image	Gwyliau / Safle Gwersylla*

Ynglŷn â safleoedd y Goedwig Genedlaethol yn yr adran hon

Coedwig Ogwr (Nant y Moel)

Mae coedwig Nant y Moel yn rhan o floc Coedwig Ogwr, sy’n cael ei reoli gan Cyfoeth Naturiol Cymru ac mae’n rhan o Goedwig Genedlaethol Cymru.

Mae Nant y Moel yn goedwig gonwydd ucheldirol sydd wedi'i lleoli ar rannau uchaf Cwm Ogwr, Pen-y-bont ar Ogwr. Planhigfa fasnachol sy'n cynnwys Sbriws Sitca, Pinwydd yr Alban ac ardaloedd bychain o goetir llydanddail cymysg.

Mae’r coetir wedi dioddef difrod gan y gwynt, lle mae stormydd diweddar wedi dadwreiddio neu dorri coed. Byddwch yn ymwybodol y bydd gwaith yn digwydd yma i adfer y difrod storm. Dilynwch arwyddion diogelwch a dargyfeiriadau ar y tir.

Ffin Parc Coedwig Afan (Blaengwynfi)

Mae Parc Coedwig Afan yn cael ei reoli gan Cyfoeth Naturiol Cymru ac mae'n rhan o Goedwig Genedlaethol Cymru. Mae Parc Coedwig Afan yn dirwedd o ochrau dyffryn serth, coedwigoedd conwydd trwchus a chribau uchel, agored sy'n rhoi cymeriad dramatig, ac yn edrych bron fel ei fod wedi’i gerfio.

Canolfan Ymwelwyr Afan yw’r prif borth i Barc Coedwig Afan, gan gynnig cymysgedd o gyfleusterau ymarferol a mynediad i rai o lwybrau gorau'r ardal.

Gallwch ddarganfod mwy am Barc Coedwig Afan ar wefan Cyfoeth Naturiol Cymru.

Bloc Cwm Saerbren

Yn rhan o Goedwig Genedlaethol Cymru, rydym yn ymestyn ar hyd ffin Cwm Saerbren, Treherbert. Mae Croeso i’n Coedwig yn rheoli ardal o goetir Cwm Saerbren CNC drwy Gytundeb Rheoli Cymunedol ar gyfer gweithgareddau fel rheoli'r coed, creu a chynnal llwybrau troed, gan hefyd greu lleoedd ar gyfer cynnal gweithgareddau cymunedol ac addysgol.

Glyncorrwg (Coedwig Cymer)

Mae Glyncorrwg yn rhan o Goedwig Genedlaethol Cymru, a reolir gan Cyfoeth Naturiol Cymru. Mae'n cynnwys Fferm Wynt Pen y Cymoedd Vattenfall, y prosiect gwynt mwyaf yng Nghymru a Lloegr ar y tir. Wedi'i leoli ar draws y llwyfandir ucheldirol rhwng Castell-nedd ac Aberdâr, mae'r safle’n cynnwys rhostir agored, coedwigaeth fasnachol a mawndir helaeth, gan greu tirwedd o orwelion llydan a chribau agored

Eisiau gwybod mwy?

Mae Llwybr Coedwig Cymru yn cynnwys 4 adran wahanol.

Mae pob un ohonynt yn llwybrau hardd trwy safleoedd y Goedwig Genedlaethol.

Darganfod mwy