A55: 3edd bont dros y Fenai

Mae'r A55 yn bwysig yn lleol, yn genedlaethol ac yn rhyngwladol. Hon yw prif ffordd economaidd Gogledd Cymru ac mae'n rhan o lwybr Euro 22 ar y rhwydwaith Ffyrdd Traws-Ewropeaidd. 

Rydym am adeiladu trydedd bont newydd dros y Fenai er mwyn:

• gwneud y rhwydwaith yn fwy gwydn
• gwneud y ffyrdd yn fwy diogel
• ei gwneud hi'n haws i bobl gerdded a beicio
• gwella dibynadwyedd ac amseroedd teithio ar draws Afon Menai

Mae'r prosiect hwn yn dal i fod yn y camau cynllunio.

Rydym yn dilyn y camau a amlinellir yng Nghanllawiau Arfarnu Trafnidiaeth Cymru (WelTAG).

Lle rydyn ni arni

Rydym yn paratoi i gaffael ymgynghorwyr i ddatblygu'r cynllun hwn.

Y camau nesaf

Byddwn yn:

• penodi ymgynghorydd i ddatblygu cynllun rhagarweiniol
• cynnal arolygon amgylcheddol a thopograffig a gwaith ymchwilio tir
• datblygu achos busnes llawn (cam 3 WelTAG)
• ymgysylltu â rhanddeiliaid
• cyhoeddi unrhyw orchmynion drafft sydd eu hangen, er enghraifft: prynu tir yn orfodol
• ymgynghori â'r cyhoedd a rhanddeiliaid allweddol ar orchmynion drafft, gyda chyfleoedd iddynt ddangos eu cefnogaeth neu fynegi eu gwrthwynebiadau

Disgwylir i'r camau nesaf hyn o ddatblygu'r cynllun a chael y cydsyniadau cyfreithiol angenrheidiol gymryd rhwng pedair a phum mlynedd. 

Bydd cyrraedd cam adeiladu'r bont yn dibynnu ar gael y cydsyniadau cyfreithiol angenrheidiol, cyllid a phenderfyniadau'r Gweinidogion.

Gallai adeiladu pont newydd gymryd rhwng tair a phedair blynedd o'r adeg honno. 

Yr amserlen

2026

• Cyhoeddi bod gwaith datblygu yn ailddechrau ar gyfer trydedd bont dros y Fenai, gan gynnwys gwaith dylunio, asesu amgylcheddol, datblygu achosion busnes a chymeradwyaethau cyfreithiol.
• Cyhoeddi bod gwaith datblygu dargyfeirwyr gwynt a therfynau cyflymder amrywiol yn parhau ar Bont Britannia yr A55. 
• Cyhoeddi na fyddai system llif llanw tair lôn yn cael ei gweithredu ar Bont Britannia gan fod y dystiolaeth yn dangos bod pryderon diogelwch a gweithredol sylweddol yn perthyn i'r system.

2025

• Cwblhau Astudiaeth Gwydnwch Menai ar argymhellion blaenoriaeth uchel Comisiwn Trafnidiaeth Gogledd Cymru ar wneud y cysylltiadau rhwng Ynys Môn a'r tir mawr yn fwy gwydn.

2023

• Yr Adolygiad Ffyrdd yn cyhoeddi ei adroddiad terfynol yn argymell na ddylid adeiladu trydedd bont dros y Fenai.
• Mewn ymateb i'r argymhellion hyn, gofyn i Gomisiwn Trafnidiaeth Gogledd Cymru ystyried sut y gellid gwneud y cysylltiadau rhwng Ynys Môn a'r tir mawr yn fwy gwydn.

2018

• Cyhoeddi'r llwybr a ffefrir gennym ar gyfer trydedd bont dros y Fenai.
• Cyhoeddi cynllun TR111, sy'n ei gwneud yn ofynnol i'r awdurdod lleol roi gwybod i ni am geisiadau cynllunio o fewn 67m bob ochr i'r llwybr a ffefrir gennym.

2017 i 2018

• Gwneud gwaith i ddeall y problemau trafnidiaeth ar draws Afon Menai (cam 1 WelTAG).
• Cynnal ymgynghoriad cyhoeddus ar 6 opsiwn posibl (cam 2 WelTAG).
• Adolygu'r ymatebion i'r ymgynghoriad.