Y Gyfarwyddiaeth Caffael a Masnachol: adnoddau defnyddiol
Mae'r Gyfarwyddiaeth Caffael a Masnachol yn arwain dull Llywodraeth Cymru o gaffael a chyflawni masnachol ledled Cymru.
Gan adrodd i Ysgrifennydd y Cabinet dros Gyllid a'r Gymraeg, rydym yn:
- Arwain y gymuned gaffael broffesiynol yng Nghymru.
- Siapio polisi a deddfwriaeth caffael gan roi cyngor strategol i weinidogion.
- Cefnogi'r sector cyhoeddus yng Nghymru gydag offer sy'n helpu i sicrhau’r gwerth mwyaf i Gymru.
- Rheoli fframweithiau cydweithredol sy'n cyflawni gwerth, cynaliadwyedd ac effaith gymdeithasol.
- Goruchwylio arferion caffael Llywodraeth Cymru.
Polisi a deddfwriaeth
Mae’r ddeddfwriaeth sy’n llywodraethu caffael cyhoeddus yng Nghymru yn newid. Er mwyn cael mwy o wybodaeth am y ddeddfwriaeth gaffael newydd, ewch i’n gwefan Caffael Cyhoeddus Doethach yng Nghymru.
Cyswllt: TimDiwygiorBrosesGaffael@llyw.cymru
Mae Polisi Caffael a Masnachol Llywodraeth Cymru yn arwain y gwaith o ddatblygu cyngor polisi caffael, yn gosod safonau ac yn monitro canlyniadau yn erbyn nodau cyflawni. Mae'r tîm yn cefnogi'r gwaith o gyflawni caffael cymdeithasol gyfrifol ac yn hyrwyddo arfer gorau ar draws y sector cyhoeddus yng Nghymru.
Cyswllt: PolisiMasnachol@llyw.cymru
Datganiad Polisi Caffael Cymru
Mae Datganiad Polisi Caffael Cymru (WPPS) yn gosod y weledigaeth strategol ar gyfer caffael y sector cyhoeddus yng Nghymru, gan ymgorffori egwyddorion Deddf Llesiant Cenedlaethau'r Dyfodol (Cymru) 2015 er mwyn sicrhau bod caffael yn cyflawni gwerth cymdeithasol, economaidd, amgylcheddol a diwylliannol hirdymor drwy arferion cydweithredol a chynaliadwy:
Nodiadau Polisi Caffael Cymru (WPPN)
Mae Nodiadau Polisi Caffael Cymru (WPPN) yn ddogfennau cynghori a gyhoeddir gan Lywodraeth Cymru. Maent yn rhoi canllawiau i awdurdodau contractio’r sector cyhoeddus yng Nghymru ar arferion caffael, gan eu helpu i gyd-fynd â deddfwriaeth gaffael allweddol:
Cyfrifon Banc Prosiectau (PBA)
Mae Cyfrifon Banc Prosiectau yn gyfrifon wedi'u neilltuo a ddefnyddir i sicrhau taliadau teg a phrydlon yn uniongyrchol i aelodau'r gadwyn gyflenwi. Maent yn lleihau'r risg o dalu’n hwyr neu beidio â thalu o gwbl ac yn gwella llif arian, gan gyfrannu at gadwyn gyflenwi fwy gwydn yn y pen draw.
Er mwyn gweld sut mae Cyfrifon Banc Prosiectau’n gweithio, ac i gael rhagor o wybodaeth, ewch i'n gwefan.
Cymorth busnes, ymgysylltu a galluogrwydd
Mae'r gangen Cymorth Busnes, Ymgysylltu a Galluogrwydd yn chwarae rhan hanfodol wrth alluogi gwaith Cyfarwyddiaeth Caffael a Masnachol Llywodraeth Cymru. Mae'r gangen yn canolbwyntio ar feithrin galluogrwydd, cryfhau ymgysylltiad a symleiddio gweithrediadau; fel bod gan weithwyr proffesiynol ym maes caffael yr offer, y sgiliau a'r cysylltiadau sydd eu hangen arnynt i lwyddo.
Cymorth Busnes
Mae'r tîm Cymorth Busnes yn cefnogi busnes llywodraeth y Gyfarwyddiaeth Caffael a Masnachol, AD/Cyllidebol yn weithredol, yn ogystal â datblygiad sefydliadol ac adrodd corfforaethol. Mae'n gyfrifol am sefydlu Uned Adolygu Caffael Cymru mewn ymateb i ddeddfwriaeth PA23. Mae gan y gangen hon hefyd amcan i sefydlu a gweithredu Gwasanaeth Casglu Incwm cadarn ar gyfer fframweithiau cydweithredol y Gyfarwyddiaeth Caffael a Masnachol.
Cyswllt: CPD.BusinessSupport@gov.wales
Ymgysylltu â rhanddeiliaid
Mae'r tîm Ymgysylltu â Rhanddeiliaid yn arwain y gwaith o ddatblygu a chyflawni strategaeth ymgysylltu, cyfathrebu a digwyddiadau’r Gyfarwyddiaeth Caffael a Masnachol. Mae hyn yn cynnwys rheoli gweithgareddau proffil uchel fel Procurex Cymru, gan sicrhau cysylltiadau ystyrlon â rhanddeiliaid ar draws y sector cyhoeddus yng Nghymru a thu hwnt.
Adroddiad Ymgysylltu â Rhanddeiliaid y Gyfarwyddiaeth Caffael a Masnachol
Mae’r Gyfarwyddiaeth Caffael a Masnachol wedi comisiynu Jane Lynch o'r Ganolfan Caffael Gwerth Cyhoeddus i gynnal proses annibynnol i ymgysylltu â rhanddeiliaid er mwyn dod i ddeall sut mae'r Gyfarwyddiaeth Caffael a Masnachol yn perfformio yn erbyn y cyfrifoldebau a'r ymrwymiadau sydd wedi’u nodi yn Natganiad Polisi Caffael Cymru (WPPS).
Bydd y tîm Ymgysylltu â Rhanddeiliaid yn arwain yr ymateb a’r cynllun gweithredu i gryfhau'r cyflawniad yn erbyn ein cyfrifoldebau a'n hymrwymiadau yn y Datganiad WPPS.
I ddarllen yr adroddiad llawn a'i ganfyddiadau, ewch i'n gwefan.
Cyswllt: CaffaelMasnachol.Cyfathrebu@llyw.cymru
Galluogrwydd
Mae'r tîm Galluogrwydd yn cefnogi datblygiad hirdymor y proffesiwn caffael yng Nghymru drwy ddarparu offer, hyfforddiant a chydlyniant i feithrin sgiliau a chryfhau cyflawniad ar draws y sector cyhoeddus. Mae'r tîm yn helpu i sicrhau bod swyddogaethau caffael yn barod i fodloni gofynion presennol ac yn y dyfodol, wrth hyrwyddo cysondeb ac arfer gorau.
Cyd Cymru
Cyd Cymru yw’r lle cydweithredol ar gyfer cymunedau caffael a masnachol ac mae’n ganolfan ragoriaeth lle gall gweithwyr proffesiynol ddysgu a chefnogi ei gilydd yng Nghymru. Mae hefyd yn gwasanaethu fel sianel gyfathrebu ar gyfer prynwyr sector cyhoeddus.
Prentisiaeth Caffael a Chyflenwi Masnachol
Mae'r Brentisiaeth Caffael a Chyflenwi Masnachol wedi'i chynllunio i feithrin gallu craidd ar draws Llywodraeth Cymru a'r sector cyhoeddus ehangach. Mae'n cynnig llwybr strwythuredig ar gyfer datblygu gweithwyr caffael proffesiynol, gan gyfuno profiad ymarferol â dysgu achrededig trwy'r Sefydliad Caffael a Chyflenwi Siartredig (CIPS).
P'un a ydych chi am uwchsgilio staff presennol neu ddenu talent newydd i rolau masnachol, mae'r brentisiaeth hon yn cefnogi timau i gyflawni canlyniadau caffael doethach, mwy cynaliadwy.
Gallwch ddysgu mwy am y Brentisiaeth Gaffael yma.
Rheoli contractau
Mae'r Rhaglen Gallu Rheoli Contractau yn cefnogi timau'r sector cyhoeddus i gryfhau eu dull o reoli contractau'n effeithiol. Wedi'i ddatblygu gan Swyddogaeth Fasnachol y Llywodraeth, mae'n darparu offer ymarferol, arweiniad a hyfforddiant i helpu timau i wneud y mwyaf o werth, rheoli risg, a meithrin perthynas gryfach â chyflenwyr.
Mae'r rhaglen yn addas ar gyfer rheolwyr contractau newydd a phrofiadol ac mae'n cyd-fynd â safonau arfer gorau ar draws y llywodraeth.
Gallwch gael mwy o wybodaeth am y rhaglen yma.
Am fwy o wybodaeth am gyfleoedd wedi’u cyllido, e-bostiwch: GalluMasnachol@llyw.cymru
Rhaglen Dyfarniad Corfforaethol
Mae Rhaglen Dyfarniad Corfforaethol y CIPS yn rhaglen sy'n rhan o raglen gallu a chapasiti Llywodraeth Cymru. Ei nod yw:
- Rhoi cyfleoedd datblygu proffesiynol i staff
- Cefnogi gweithwyr proffesiynol caffael y dyfodol
- Lleihau'r problemau capasiti a wynebir ar draws y proffesiwn
- Codi proffil caffael yng Nghymru.
Gallwch wybod mwy am y rhaglen yma.
Prosbectws Dysgu a Datblygu
Mae ein prosbectws yn dwyn ynghyd ystod eang o gyfleoedd dysgu a ddewiswyd yn ofalus, i helpu i'ch cynorthwyo yn eich datblygiad proffesiynol, ac ar eich taith gaffael a masnachol. Mae'r prosbectws ar gael yma.
Datblygu Gyrfaoedd Proffesiynol a’r Gweithlu
Mae dau ganllaw yn cael eu datblygu i gefnogi'r proffesiwn masnachol yng Nghymru a byddant ar gael cyn bo hir. Nod yr adnoddau hyn yw codi proffil caffael fel dewis gyrfa ddeinamig a gwerth chweil, tra hefyd yn helpu cyflogwyr i feithrin gallu masnachol o fewn eu timau.
Canllaw Gwybodaeth am Yrfaoedd
Mae caffael yn yrfa bwrpasol sy’n cael effaith, gyda sawl llwybr mynediad hygyrch, megis prentisiaethau, graddau, a chynlluniau llwybr cyflym â'r nod o feithrin gallu a chynaliadwyedd hirdymor ledled Cymru.
Mae'r canllaw yn cefnogi pobl sy'n gadael yr ysgol, graddedigion, y sawl sy’n newid gyrfa, a chyflogwyr sydd â diddordeb mewn gyrfaoedd caffael yn y sector cyhoeddus yng Nghymru.
Mae'r canllaw yn cael ei ddatblygu a bydd ar gael cyn bo hir.
Canllaw i Gyflogwyr am Leoliadau Myfyrwyr
Mae Lleoliadau Myfyrwyr yn cynnig buddion i'r ddwy ochr er mwyn gwella profiad ymarferol myfyrwyr wrth helpu sefydliadau i gryfhau eu galluoedd masnachol a datblygu talent yn y dyfodol. Mae'r canllaw hwn yn cefnogi cyflogwyr i sefydlu trefniadau lleoliadau myfyrwyr effeithiol drwy ddefnyddio profiad o bob rhan o'r sector cyhoeddus yng Nghymru.
Mae'r canllaw yn cael ei ddatblygu a bydd ar gael cyn bo hir.
Cyflawni caffael
Mae'r gangen hon o fewn y Gyfarwyddiaeth Caffael a Masnachol yn dwyn ynghyd yr hen dimau Gwasanaethau Caffael Corfforaethol a Chyflawni Masnachol. Mae'n gyfrifol am gyflawni caffael penodol i Lywodraeth Cymru, ochr yn ochr â rhaglen ehangach o gytundebau cydweithredol ar gyfer sector cyhoeddus Cymru.
Gan weithio mewn partneriaeth â Llywodraeth Leol yng Nghymru, a chyrff eraill y sector cyhoeddus, rydym wedi datblygu Piblinell Caffael Cydweithredol Cymru, sy'n cynnwys dros 40 o gytundebau i'w defnyddio ar draws sector cyhoeddus Cymru.
Mae ein llyfryn fframwaith yn rhoi’r holl wybodaeth sydd ei hangen arnoch i gael gafael ar y cytundebau hyn.
Ein Timau
Mae'r gangen Cyflenwi Caffael yn gweithredu ar draws y categorïau canlynol:
Gwasanaethau Proffesiynol ac Ymchwil
Mae'r categori hwn yn ymdrin â chaffael gwasanaethau ymgynghori, cyfreithiol, ariannol ac ymchwil arbenigol sy'n cefnogi llunio polisïau sy'n seiliedig ar dystiolaeth a gwneud penderfyniadau strategol ar draws sector cyhoeddus Cymru.
Cyswllt: CaffaelMasnachol.GwasanaethauProffesiynol@llyw.cymru
Pobl a Gwasanaethau Corfforaethol
Yn canolbwyntio ar ddod o hyd i wasanaethau AD, hyfforddiant a datblygu, recriwtio, iechyd galwedigaethol, a gwasanaethau cymorth corfforaethol mewnol eraill sy'n galluogi rheolaeth effeithiol o’r gweithlu a’r sefydliad.
Cyswllt: CaffaelMasnachol.PoblaChorfforaethol@llyw.cymru
Adeiladu a Chyfleusterau
Yn ymdrin â chaffael gwaith adeiladu, cynnal a chadw adeiladau, rheoli cyfleusterau, a gwasanaethau sy'n gysylltiedig ag ystadau er mwyn cefnogi seilwaith diogel, cynaliadwy ac effeithlon.
Cyswllt: CaffaelMasnachol.Adeiladau@llyw.cymru
TGCH
Yn ymdrin â chaffael atebion digidol a thechnoleg, gan gynnwys meddalwedd, caledwedd, gwasanaethau cwmwl, ac ymgynghoriaeth TG, er mwyn cefnogi trawsnewid digidol a gwydnwch gweithredol.
Cyswllt: ICTProcurement@llyw.cymru
Y Fflyd, Logisteg a Chyfleustodau
Yn canolbwyntio ar gaffael cerbydau fflyd, gan gynnwys mentrau cerbydau trydan, gwasanaethau trafnidiaeth a logisteg, tanwydd, ynni a chyfleustodau, gyda phwyslais cryf ar gynaliadwyedd a gwerth am arian.
Cyswllt: CaffaelMasnachol.Fflyd@llyw.cymru / CaffaelMasnachol.Cyfleustodau@llyw.cymru
Gweithredu a Llywodraethiant
Mae'r tîm hwn yn cefnogi gweithgareddau llywodraethiant a sicrwydd caffael a gweithredu polisi, gan sicrhau bod arferion caffael yn cyd-fynd ag amcanion deddfwriaethol a strategol.
Cyswllt: CaffaelMasnachol.Cyflawni@llyw.cymru
Digidol a data
Mae tîm digidol a data Llywodraeth Cymru yn darparu cyfres o offer digidol i gefnogi'r sector cyhoeddus yng Nghymru drwy gamau yn eu taith gaffael.
Mae'r offer yn cynnwys:
eDendroCymru
Mae eDendroCymru yn offeryn eGyrchu a ddarperir gan Jaggaer, sydd ar gael i sefydliadau sector cyhoeddus Cymru. Mae'n rhan o gyfres o offer sy'n cefnogi llifoedd gwaith, tendro, gwerthuso, rheoli contractau, a pherfformiad cyflenwyr. Mae'r platfform yn caniatáu i gyflenwyr gyflwyno cyfleoedd tendro’n ddiogel, cael gafael ar ddogfennau tendro’n hawdd, dychwelyd tendrau trwy system warchodedig, a chodi ymholiadau’n dryloyw drwy gydol y broses dendro.
Ewch i edendrocymru: porth e-dendro
I weld yr hyfforddiant:
- Cliciwch ar eich proffil defnyddiwr
- Dewiswch Help
- Cliciwch y deilsen Sourcing+ a dewiswch bwnc
Dunn and Bradstreet (D&B) finance analytics
Mae D&B Finance Analytics yn ddatrysiad rheoli credyd hyblyg a hawdd ei ddefnyddio.
Mae adnoddau hyfforddi ar gael o fewn y platfform. I weld yr hyfforddiant:
- Cliciwch y deilsen Finance Analytics
- Cliciwch yr eicon marc cwestiwn ar y dudalen gartref
- Dewiswch Training Resources a chwiliwch am bynciau perthnasol
Cofrestrwch ar gyfer gwefan gymuned Cwsmeriaid D&B. Yma gallwch ddod o hyd i atebion i gwestiynau allweddol a chodi achos dros faterion fel ailosod cyfrinair. Rydym yn annog defnyddwyr i rannu eu hawgrymiadau a'u triciau ar y tudalennau cymunedol.
AWARD (Commerce Decisions)
Mae AWARD, a ddatblygwyd gan Commerce Decisions, yn blatfform gwerthuso a gwneud penderfyniadau a ddefnyddir ym maes caffael i gefnogi gwerthusiadau cadarn y gellir eu harchwilio, ac mae’n helpu i sicrhau tegwch, cysondeb a gwerth am arian wrth ddewis cyflenwyr.
Ewch i wefan mewngofnodi AWARD
Mae hyfforddiant ar gael trwy'r Sylfaen Wybodaeth barod.
I weld yr hyfforddiant:
- Mewngofnodwch a chlicio ar Help and Guidance ar y bar uchaf
- Porwch neu chwiliwch am y pwnc neu'r erthygl sydd ei angen arnoch
Cardiau Prynu (Barclaycard)
Darperir cardiau prynu gan Barclaycard i sefydliadau’r sector cyhoeddus yng Nghymru i’w defnyddio yn eu gweithgareddau caffael. Mae gan bob sefydliad gytundebau unigol â Barclaycard.
Ewch i wefan Cardiau Prynu Barclaycard
Contact: OfferCaffaelDigidol@llyw.cymru