Gofal Argyfwng ac Acíwt Cymru - Cymorth, atebolrwydd, a sicrwydd
Fframwaith i wella gofal argyfwng a gofal ysbyty yng Nghymru, gan helpu pobl i gael triniaeth yn brydlon a gwella'n ddiogel gartref.
Ar y dudalen hon
Atebolrwydd a sicrwydd
Mae gwella canlyniadau gofal argyfwng ac acíwt yn gyfrifoldeb a rennir drwy'r system iechyd a gofal gyfan:
- Mae byrddau iechyd ac ymddiriedolaethau'r GIG yn atebol am gynllunio, comisiynu a darparu gwasanaethau diogel ac effeithiol sy'n bodloni'r disgwyliadau a nodir yn y Fframwaith hwn.
- Mae Byrddau Partneriaeth Rhanbarthol yn chwarae rhan hollbwysig wrth gryfhau'r broses integreiddio rhwng iechyd, gofal cymdeithasol a gwasanaethau cymunedol, yn enwedig mewn perthynas ag atal, adfer, adsefydlu a phontio rhwng gofal.
Mae'r cerrig milltir a nodir yn y Fframwaith hwn yn disgrifio'r newidiadau y disgwyliwn eu cyflawni erbyn 2030.
Bydd Perfformiad a Gwella GIG Cymru, gan weithio gyda Bwrdd Arweinyddiaeth GIG Cymru a'i strwythurau llywodraethu a chyflawni ategol, yn datblygu ac yn goruchwylio cynlluniau gweithredu manwl i'w helpu i'w cyflawni.
Bydd y cynlluniau hyn yn dwyn ynghyd flaenoriaethau perfformiad a gwella, ac yn nodi camau gweithredu, cyfrifoldebau, mesurau a threfniadau adrodd, yn unol â phrosesau cynllunio, perfformiad ac atebolrwydd presennol GIG Cymru.
Yn ogystal â cherrig milltir cyflawni, bydd cynnydd yn cael ei fonitro drwy gyfuniad o fesuriadau canlyniad a mesuriadau proses.
Erbyn mis Ebrill 2027, bydd Llywodraeth Cymru a Perfformiad a Gwella GIG Cymru yn cytuno, ar y cyd ag arweinwyr clinigol a phroffesiynol, ar set genedlaethol o ddangosyddion canlyniad, mesuriadau proses ategol a, lle y bo'n briodol, dargedau gwella meintiol.
Bydd y rhain yn pennu llinellau sylfaen a thaflwybrau ar gyfer cyflawni yn erbyn cerrig milltir y Fframwaith, gan gynnwys lleihau gofal mewn coridor, oedi y gellid ei osgoi ac amser diangen yn yr ysbyty.
Bydd y dangosyddion canlyniadau a ddatblygwyd i gefnogi'r Fframwaith hwn yn cyd-fynd â'r dull gweithredu ehangach, Canlyniadau Iechyd i Gymru, gan sicrhau bod gwelliant mewn gofal argyfwng a gofal acíwt yn cyfrannu at y canlyniadau iechyd yr ydym am eu gweld ar gyfer poblogaeth Cymru, ac yn cael ei asesu yn eu herbyn.
Bydd Llywodraeth Cymru yn gyfrifol am oruchwylio'r broses gyflawni o safbwynt strategol drwy drefniadau cynllunio, perfformiad ac atebolrwydd sy'n bodoli eisoes, a bydd disgwyl i fyrddau iechyd, ymddiriedolaethau'r GIG a phartneriaid ddangos gwelliant parhaus, cydweithio ar draws ffiniau sefydliadol a defnyddio data mewn ffordd dryloyw er mwyn deall amrywiadau a gwella canlyniadau.
Galluogwyr cyflawni
Ni ellir cyflawni'r uchelgeisiau a nodir yn y Fframwaith hwn drwy ailgynllunio gwasanaethau yn unig.
Er mwyn sicrhau gwelliant cynaliadwy mewn gofal argyfwng ac acíwt bydd angen set o alluogwyr trawsbynciol sy'n cefnogi pob rhan o'r llwybr, o'r cyswllt cyntaf hyd at adfer gartref.
Mae'r galluogwyr hyn yn sail i'r chwe chonglfaen ac maent yn hanfodol i wella canlyniadau, lleihau amrywiadau a sicrhau bod gwasanaethau yn parhau i fod yn gynaliadwy ar gyfer cenedlaethau'r dyfodol.
1. Gofal argyfwng ac acíwt teg
Dylai pobl gael gofal argyfwng ac acíwt o ansawdd uchel, ni waeth beth fo'u sefyllfa o ran oedran, anabledd, ethnigrwydd, iaith, lleoliad, amgylchiadau economaidd-gymdeithasol neu anghenion unigol.
Ni ddylid mesur tegwch drwy fynediad cyfartal at wasanaethau yn unig, ond drwy sicrhau bod pobl yn cael y cymorth, yr addasiadau a'r gofal cydgysylltiedig sydd eu hangen i sicrhau canlyniadau teg, ni waeth beth fo'u hamgylchiadau neu eu cefndir.
Wrth gynllunio gwasanaethau rhaid sicrhau bod tegwch yn cael ei ystyried o'r cychwyn cyntaf, gan sicrhau bod gofal yn hygyrch, yn gynhwysol ac yn ymatebol i anghenion cymunedau amrywiol ledled Cymru.
Dylai sefydliadau ddefnyddio data ac ymgysylltu er mwyn nodi anghydraddoldebau o ran mynediad, profiad a chanlyniadau a chymryd camau i fynd i'r afael â nhw.
Dylai gwasanaethau gydnabod ac ymateb i anghenion pobl sy'n profi anfantais, sydd wedi'u hallgáu neu sy'n wynebu rhwystrau i gael gofal, gan gynnwys y rhai lle mae angen addasiadau rhesymol, cyfathrebu hygyrch, eiriolaeth, cymorth gofalwyr neu gymorth ychwanegol i sicrhau canlyniadau teg.
Er mwyn helpu i gyflawni'r uchelgeisiau hyn, bydd Llywodraeth Cymru yn gweithio gyda phartneriaid i ddatblygu Cynllun Gweithredu Tegwch ar gyfer gofal argyfwng ac acíwt.
Bydd y Cynllun yn amlinellu'r camau gweithredu sydd eu hangen yn genedlaethol ac yn lleol i nodi anghydraddoldebau y gellid eu hosgoi o ran mynediad, profiad a chanlyniadau i bobl sy'n defnyddio gwasanaethau gofal argyfwng ac acíwt, eu lleihau, ac yn y pen draw, eu dileu.
2. Gofal a alluogir gan dechnoleg
Dylai technoleg gefnogi gofal y tu hwnt i ffiniau sefydliadol a ffisegol traddodiadol.
Gall ymgyngoriadau digidol, monitro o bell, gwasanaethau rhithwir, teleiechyd a thechnolegau cynorthwyol helpu pobl i gael asesiad amserol, triniaeth, cymorth i adfer a gofal dilynol yn nes at y cartref.
Dylid defnyddio gofal a alluogir gan dechnoleg i wella mynediad, cefnogi prosesau gwneud penderfyniadau clinigol a lleihau nifer yr achosion o dderbyn i'r ysbyty yn ddiangen lle y bo'n briodol.
Dylid ystyried profion ar adeg rhoi gofal, dehongli o bell gan arbenigwyr a diagnosteg â chymorth digidol lle y bo'n briodol o safbwynt clinigol er mwyn lleihau faint o amser a gymerir cyn diagnosis, cefnogi gofal yn nes at y cartref a lleihau achosion o drosglwyddo neu dderbyn i'r ysbyty y gellid eu hosgoi.
Bydd y broses o gyflawni'r Fframwaith hwn yn cyd-fynd â rhaglen gwella Gofal a alluogir gan Dechnoleg GIG Cymru sydd wrthi'n cael ei datblygu, ac yn ei chefnogi, gan sicrhau bod datrysiadau digidol a datrysiadau a alluogir gan dechnoleg yn cael eu datblygu a'u gweithredu fel galluogwyr craidd gofal integredig sy'n canolbwyntio ar yr unigolyn.
3. Digidol a data
Mae'r Fframwaith hwn a Strategaeth Newid Digidol a Data y Grŵp Iechyd, Gofal ac Atal sydd wrthi'n cael ei datblygu yn rhannu uchelgais gyffredin i greu system iechyd a gofal fwy cysylltiedig, a lywir gan ddata.
Drwy ryngweithredu gwell, gwybodaeth weithredol amser real a defnydd cryfach o ddata i sbarduno gwelliant, byddant yn cefnogi un olwg ar lif cleifion ac yn galluogi gofal mwy diogel, amserol a chydgysylltiedig o ymateb mewn argyfwng hyd at adfer gartref.
Dylai gwybodaeth am ofal, triniaeth a dymuniadau unigolyn ei ddilyn yn ddi-dor drwy gydol ei daith, gan leihau achosion o ddyblygu, cefnogi prosesau ar gyfer gwneud penderfyniadau clinigol a helpu pobl i gael profiad o ofal fel un llwybr cydgysylltiedig yn hytrach na chyfres o wasanaethau ar wahân.
Dylai datrysiadau digidol a data olygu bod modd cytuno ar fodelau gofal, cefnogi llwybrau safonol a darparu'r wybodaeth sydd ei hangen i wella canlyniadau, profiad a pherfformiad systemau.
Dylai systemau digidol gefnogi ceisiadau electronig, y gallu i weld statws diagnostig mewn amser real, adroddiadau amserol a phroses ddibynadwy o roi gwybod am ganlyniadau mewn lleoliadau gofal.
Dylai data fesur y llwybr llawn o gais diagnostig i gamau clinigol, gan alluogi sefydliadau i nodi oedi, amrywiadau a chyfleoedd i wella.
4. Gweithlu cynaliadwy
Bydd cyflawni'r Fframwaith hwn yn dibynnu ar weithlu medrus a chynaliadwy a gefnogir.
Mae'n cyd-fynd â'r Strategaeth Hirdymor ar gyfer Gweithlu GIG Cymru sydd wrthi'n cael ei datblygu a'i blaenoriaethau, sef gweithleoedd iach a chynhwysol, gwasanaethau cynaliadwy a defnydd effeithiol o adnoddau;
Bydd y strategaeth yn helpu gwasanaethau i gynllunio a datblygu'r gweithlu, y sgiliau, y rolau a'r timau amlddisgyblaethol sydd eu hangen i ymateb i anghenion newidiol y boblogaeth a darparu gofal diogel a chynaliadwy sy'n canolbwyntio ar yr unigolyn.
Dylai cynlluniau'r gweithlu gynnwys yr adnoddau clinigol, gwyddonol, technegol a chymorth sydd eu hangen i ddarparu diagnosteg gyflym dros saith diwrnod.
Mae hyn yn cynnwys radioleg, patholeg, endosgopi, gwyddoniaeth ffisiolegol, profion ar adeg rhoi gofal a'r gweithlu arbenigol sydd ei angen i ddehongli canlyniadau a'u troi'n benderfyniadau clinigol amserol.
5. Atebolrwydd, cymorth a sicrwydd
Mae gwella canlyniadau gofal argyfwng ac acíwt yn gyfrifoldeb a rennir drwy'r system iechyd a gofal gyfan.
Mae gan Lywodraeth Cymru, Perfformiad a Gwella GIG Cymru, byrddau iechyd, ymddiriedolaethau'r GIG, Byrddau Partneriaeth Rhanbarthol a sefydliadau partner i gyd rôl benodol i'w chwarae i osod cyfeiriad, sicrhau gwelliant, rhoi cymorth a rhoi sicrwydd ynglŷn â chynnydd.
Mae angen disgwyliadau clir, prosesau adrodd tryloyw a threfniadau llywodraethu effeithiol i ddeall perfformiad, nodi amrywiadau, cefnogi gwelliant a sicrhau bod pobl yn cael gofal diogel o ansawdd uchel, ni waeth ble maent yn byw neu'n defnyddio gwasanaethau.
Bydd atebolrwydd yn canolbwyntio nid yn unig ar berfformiad sefydliadol, ond ar y canlyniadau, y profiadau a'r gwelliannau a gyflawnir i bobl sy'n defnyddio gwasanaethau gofal argyfwng ac acíwt.
Dylid ei gefnogi drwy fod yn agored, dysgu ar y cyd, gwelliant yn seiliedig ar dystiolaeth ac ymrwymiad cyfun i leihau amrywiad direswm ledled Cymru.
6. Ystadau a chyfleusterau
Mae'r Fframwaith yn cyd-fynd â Strategaeth Ystadau a Chyfleusterau y Grŵp Iechyd, Gofal ac Atal sydd wrthi'n cael ei datblygu, gan gydnabod bod yr amgylcheddau y darperir gofal ynddynt yn chwarae rôl allweddol yng nghanlyniadau, profiad, diogelwch a llif cleifion.
Mae'r ddau yn rhannu ymrwymiad i sicrhau bod seilwaith iechyd a gofal yn gynaliadwy, yn addas at y diben ac wedi'i gynllunio i gefnogi modelau gofal modern.
Dylid lleoli a chyflunio adnoddau diagnostig ar sail llwybrau gofal argyfwng, gofal acíwt a gofal yr un diwrnod modern.
Dylai gwaith cynllunio ystadau gefnogi mynediad cyflym at ddelweddu, patholeg, profion ffisiolegol a diagnosteg flaenoriaethol arall, gan hefyd ei gwneud yn bosibl i ddiagnosteg briodol gael ei darparu mewn lleoliadau cymunedol pan fo hyn yn ddiogel ac yn effeithiol.
