Pryd i ddefnyddio tablau a sut i’w gwneud yn ddealladwy.
Cynnwys
Pryd i’w defnyddio
Dim ond er mwyn cyflwyno data y dylech ddefnyddio tablau, dylai’r data yma fod yn rhifol fel arfer. Peidiwch â defnyddio tablau i gyflwyno gwybodaeth y gallech ei dangos ar ffurf rhestr. Enghreifftiau o sut i drosi tablau sy'n cynnwys testun yn unig yn ffurfiau eraill sy’n cynnwys testun yn unig ac sy’n fwy hygyrch a hawdd eu defnyddio.
Gwneud tablau’n ddealladwy
Rhaid cynnwys rhes pennawd ar dabl i esbonio beth sy’n cael ei gynnwys yn y colofnau.
| Methu â chyflwyno ffurflen dreth mewn da bryd | Cosb |
|---|---|
| 1 diwrnod yn hwyr | £100 |
| 6 mis yn hwyr | £300 yn ychwanegol neu 5% o unrhyw dreth sydd heb ei dalu, pa un bynnag sydd fwyaf |
| 12 mis yn hwyr | £300 arall neu 5% o unrhyw dreth sydd heb ei dalu, pa un bynnag sydd fwyaf |
| 30 awr yr wythnos neu fwy |
Llai na 30 awr yr wythnos |
|
|---|---|---|
| 16 i 24 oed | £4000 | £2000 |
| 25 oed a hŷn | £2000 | £1000 |
| Ailgyflogi prentisiaid a ddiswyddwyd | £2600 | £1300 |
Arddull
Cadwch y testun yn y celloedd yn gryno ac yn glir, a dilynwch y canllaw arddull. Rhaid ichi:
- alinio penawdau a data mewn colofnau i’r ochr dde er mwyn gallu cymharu rhifau
- gosod coma mewn rhifau dros 999 i sicrhau eglurder, er enghraifft 9,000
Cewch wyro oddi wrth arddull LLYW.CYMRU er mwyn:
- byrhau enwau misoedd i arbed lle, er enghraifft, Ion, Chwe
- defnyddio gwahannod i ddangos rhychwant rhwng rhifau, er enghraifft, 500-900
- defnyddio rhifau drwy’r tabl (peidiwch â defnyddio trefnolion, er enghraifft, cyntaf, ail, 10fed)
Dylech osgoi rhannu celloedd unigol neu gyfuno nifer o gelloedd.
Maint
Mae maint y tabl yn effeithio ar ba mor hawdd yw hi i bobl ei ddarllen a’i ddeall.
Ni ddylai tabl fod yn llai na 2 golofn a 3 rhes (gan gynnwys pennawd colofn), ond os yw’ch tabl mor fach â hynny, efallai y byddai’n well defnyddio testun normal.
Ceisiwch beidio â defnyddio mwy na 4 colofn. Gan ddibynnu ar y testun, gall tablau o’r fath ffitio’n gyfforddus ar sgrin ffôn clyfar fel arfer. Os yw'n edrych yn ormod, ystyriwch rannu’ch data rhwng tablau.
Defnyddio’r offeryn tabl yn Drupal
I fewnosod tabl mewn paragraff cynnwys:
- dewiswch yr eicon tablau ar y bar offer
- dewiswch nifer y rhesi a'r colofnau y mae eu hangen arnoch ar gyfer eich tabl
- dewiswch yr opsiwn cywir ar gyfer y pennawd fel bod y testun yn y pennawd yn cael ei labelu (First row, first column neu both)
- ychwanegwch destun y pennawd er mwyn rhoi teitl i’r tabl
- dewiswch OK i greu’r tabl ac ewch ati i’w lenwi yn ôl yr angen
Dylech gopïo a gludo tablau data i mewn i Drupal i sicrhau bod y data yn gywir.
Pan fyddwch yn copïo a gludo tabl i Drupal, i sicrhau bod penynnau colofnau a rhesi yn cael eu fformatio'n gywir, mae angen i chi eu diffodd ac yna eu troi yn ôl ymlaen:
- de ddewiswch y tabl a dewis Table Properties
- newidiwch ddewis y pennyn i None
- dewiswch OK
- newidiwch ddewis y pennyn i First row, First column neu both
- dewiswch OK
Defnyddir first row ar gyfer tabl os dim ond yn y rhes gyntaf y mae penawdau (tabl enghreifftiol ag 1 pennawd).
Defnyddir first column ar gyfer tablau os dim ond yn y golofn gyntaf y mae penawdau.
Defnyddir both ar gyfer tablau lle mae penawdau yn y rhes uchaf a’r golofn gyntaf (tabl enghreifftiol â 2 bennawd). Os oes gennych gell gwag yn eich rhes pennawd neu yn eich colofn pennawd, bydd hynny’n achosi gwall hygyrchedd. Rhaid ichi dde-glicio ar y gell, dewis Cell Properties a newid Cell Type i Data.
Defnyddiwch y ddewislen style yn y bar offer i alinio data’r gell i table cell align right.