Canllawiau ar ffeilio ffurflenni Treth Gwarediadau Tirlenwi

Gwarediadau ar ôl disgowntiau a rhyddhadau

Bydd angen i chi gofnodi gwybodaeth am y rhan fwyaf o'r deunydd cyfradd safonol yn yr adran hon. Bydd hwn yn cael ei gofnodi fel un cyfanswm.

Bydd angen i chi hefyd gofnodi symiau unigol ar gyfer pob deunydd gwastraff sy’n ddarostyngedig i gyfradd dreth is yn erbyn pob cod Cod Gwastraff Ewropeaidd (EWC).

Gwarediadau y mae disgownt dŵr yn berthnasol iddynt

Bydd angen i chi gael cymeradwyaeth gennym i weithredu cynllun disgownt dŵr.

Bydd angen gwybodaeth ar gyfer pob cymeradwyaeth:

• ar bwysau cyffredinol y deunydd gwastraff, ac
• a yw'n cael ei godi ar y gyfradd dreth safonol neu is

Bydd y system yn cyfrifo'r disgownt, ond ni fydd yn cyfrifo'r ffigwr treth.

Rhyddhadau

Bydd angen i chi gofnodi tunnelled y gwarediadau deunyddiau lle rydych yn hawlio rhyddhad.

Cymysgeddau o ddeunyddiau sy'n cynnwys dim ond gronynnau mân

Mae angen i chi ddarparu mwy o wybodaeth am 'gymysgeddau o ronynnau mân' a dderbynnir.

Mae cymysgeddau o ronynnau mân yn ronynnau o ddeunydd a gynhyrchir gan broses trin gwastraff sy'n cynnwys triniaeth fecanyddol.

Er mwyn i gymysgedd o ddeunyddiau sy'n cynnwys dim ond gronynnau mân gael ei drin fel cymysgedd cymwys o ddeunyddiau sy'n gymwys ar gyfer y gyfradd is, bydd angen iddo fodloni gofynion penodol o fewn:

• Deddfwriaeth Cymru (adrannau 16 a 17 o Ddeddf Treth Gwarediadau Tirlenwi (Cymru) 2017) ('DTGT')
• ein hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'
• ein Rheoliadau Treth Gwarediadau Tirlenwi (Gweinyddu) (Cymru) 2018 Rheoliadau 4 a 5

Bydd arnoch hefyd angen:

• nifer y profion colled wrth danio a fethwyd
• nifer y profion colled wrth danio a gollwyd
• pwysau'r llwythi dan sylw

Ar gyfer pob cynhyrchydd gwastraff sy'n dodi cymysgeddau o ronynnau mân, bydd angen i chi:

• ddisgrifio'r cymysgeddau o 'ronynnau mân' o'r Nodyn Dyletswydd Gofal/Trosglwyddo Gwastraff
• nodi a yw hon yn ffrwd wastraff risg uchel a/neu risg isel
• darparu pwysau cyffredinol y llwythi sydd wedi'u profi
• darparu nifer y profion colled wrth danio a basiwyd
• darparu nifer y profion na dderbyniwyd y canlyniadau eto

• Ni fyddwch yn gallu cael mynediad at unrhyw ffurflenni TGT a gyflwynwyd gennych rhwng 1 Ebrill 2018 a 31 Mawrth 2021. Cysylltwch â'ch rheolwr cysylltiadau cwsmeriaid os oes angen copïau o'r ffurflenni hyn arnoch.
• Mae eich safleoedd tirlenwi wedi'u rhestru ar dabiau ar wahân. Mae'n rhaid i chi gyflwyno gwybodaeth ar gyfer pob safle tirlenwi rydych chi'n eu gweithredu yng Nghymru.
• Bydd gwybodaeth a roddwch yn cael ei chadw'n awtomatig wrth i chi fynd drwy'r ffurflen.
• Mae'r ffurflen dreth yn benodol i'ch safle tirlenwi a'r hyn y mae'n ei dderbyn. Mae'n cynnwys gwybodaeth wedi'i darparu ymlaen llaw am:
  • ddeunydd gwastraff cyfradd is
  • disgowntiau dŵr
  • 'cymysgeddau o ronynnau mân'
• Os oes unrhyw wybodaeth ar goll o'ch ffurflen pan fyddwch yn dod i'w chwblhau, cysylltwch â'ch rheolwr cysylltiadau cwsmeriaid ar unwaith i ddiweddaru'r system ar eich rhan. Os ydych wedi cychwyn eich ffurflen dreth, ac yna’n sylweddoli fod angen i chi ychwanegu codau newydd, bydd yn rhaid i chi ddileu'r drafft a'i hail-greu unwaith y bydd y codau newydd wedi'u hychwanegu.
• Dim ond os oes gennych wybodaeth i'w hychwanegu y mae angen i chi gael mynediad at adrannau.

Gwastraff cyfradd safonol

Os nad ydych wedi derbyn unrhyw ddeunydd gwastraff cyfradd safonol yn ystod y cyfnod hwn, bydd y system yn rhagosod i sero.

Rhowch un ffigur tunelledd ar gyfer pob gwarediad sy’n ddarostyngedig i’r gyfradd safonol yn y cyfnod hwn.

Dylech gynnwys gwybodaeth am:

• y pwysau ar gyfer yr holl wastraff cyfradd safonol
• unrhyw gytundebau disgownt dŵr ar gyfer gwastraff cyfradd safonol, pwysau'r gwastraff ar ôl i'r disgownt gael ei gymhwyso
• y pwysau ar gyfer unrhyw gymysgedd o ddeunyddiau sy'n cynnwys dim ond gronynnau mân a godir ar y gyfradd safonol

Cyfeiriwch at gyfraddau’r Dreth Gwarediadau Tirlenwi.

Rhowch y ffigur i 2 le degol.

Peidiwch â chynnwys gwybodaeth am:

• gymysgeddau o ronynnau mân sy'n gymwys ar gyfer y gyfradd is
• cymysgeddau safonol o ronynnau mân oherwydd profion colled wrth danio a fethwyd neu a gollwyd
• gwarediadau y mae unrhyw un o'r rhyddhadau’n berthnasol iddynt, er enghraifft, adfer safle
• gwarediadau y mae disgownt dŵr yn berthnasol iddynt

Dewiswch 'Golygu' a rhowch un ffigur ar gyfer cyfanswm y pwysau.

Dewiswch 'Cadw', a byddwch yn dychwelyd i brif dudalen y safle tirlenwi.

Cyfradd is

Darparwch wybodaeth ar gyfer deunydd gwastraff a dderbyniwch sy’n ddarostyngedig i’r gyfradd dreth is.

Fe welwch restr o godau 6 digid a disgrifiad. Cyfeirir at y cod hwn hefyd fel y Cod Gwastraff Ewropeaidd (EWC) neu god Rhestru Gwastraff. Mae'r disgrifiad yr un fath â'r un yng nghatalog y Cod Gwastraff Ewropeaidd.

Os nad ydych wedi derbyn deunydd gwastraff ar gyfer cod 6 digid a disgrifiad penodol yn y cyfnod hwn, bydd y system yn rhagosod i sero.

Dewiswch 'Golygu' wrth y cod perthnasol a rhowch y pwysau mewn tunelli ar gyfer y deunydd gwastraff hwn i 2 le degol.

Dylech gynnwys gwybodaeth am:

• ddeunydd sy’n gymwys yn gyfan gwbl
• unrhyw gytundebau disgownt dŵr ar gyfer gwastraff cyfradd is, pwysau'r gwastraff ar ôl i'r disgownt gael ei gymhwyso
• cymysgeddau cymwys o ddeunyddiau ac eithrio cymysgeddau o ronynnau mân

Dewiswch 'Cadw', a byddwch yn dychwelyd i’r rhestr o godau 6 digid a disgrifiadau.

Ailadroddwch ar gyfer pob cod lle mae angen i chi gofnodi gwybodaeth ar gyfer y cyfnod. Peidiwch â chofnodi gwarediadau rydych chi'n hawlio rhyddhad ar eu cyfer.

Ar gyfer codau lle nad yw pwysau'n cael ei gofnodi ar gyfer y cyfnod, bydd y system yn rhagosod i sero.

Os nad oes gennych unrhyw gytundebau disgownt dŵr gyda ni, ni fyddwch yn gweld yr adran hon.

Os oes gennych gytundebau disgownt dŵr ar waith gyda ni, bydd cyfeirnod y cytundeb yn cael ei restru gyda:

• chynhyrchwyr gwastraff
• disgrifiad o'r gwastraff

Byddwn wedi rhoi'r cyfeirnod hwn i chi pan roesom y cytundeb disgownt dŵr i chi.

Cysylltwch â'ch rheolwr cysylltiadau cwsmeriaid os:

• nad ydych yn adnabod y cyfeirnod hwn
• y credwch ei fod yn anghywir
• rydych yn defnyddio cytundeb disgownt dŵr nad yw yn y rhestr hon

Os oes angen i chi, gwnewch gais i weithredu cytundeb disgownt dŵr newydd.

Os nad ydych wedi derbyn deunydd gwastraff ar gyfer cytundeb disgownt dŵr penodol yn y cyfnod hwn, bydd y system yn rhagosod i sero.

Dewiswch 'Golygu' ar enw’r disgownt a rhif y cytundeb perthnasol i gofnodi gwybodaeth.

Bydd y sgrin yn cynnwys rhif y cytundeb, y cod dosbarthu gwastraff a disgownt canrannol ar gyfer y cytundeb hwn.

Cyfradd safonol neu is

Dewiswch a yw'r deunydd gwastraff sy'n ddarostyngedig i'r disgownt dŵr ar gyfradd safonol neu gyfradd is.

Pwysau’r gwastraff cyn disgownt

Nodwch bwysau cyffredinol y gwarediad cyn i'r disgownt gael ei gymhwyso i 2 le degol.

Dewiswch 'Cyfrifo', a bydd y system yn cyfrifo Pwysau’r gwastraff ar ôl disgownt, a byddwch yn gweld y pwysau newydd. Dylid cofnodi'r pwysau hwn yn yr adran 'Gwarediadau ar ôl disgowntiau a rhyddhadau', fel cyfradd safonol neu gyfradd is.

Dewiswch 'Cadw', a byddwch yn gallu cofnodi gwybodaeth ar gyfer y cytundeb disgownt dŵr nesaf os oes gennych un.

Os nad ydych yn hawlio unrhyw ryddhadau, bydd y system yn rhagosod i sero.

Ar gyfer pob un o'r 4 categori o ryddhadau, dewiswch 'Golygu' a rhowch y pwysau mewn tunelli.

Ar gyfer deunydd a ddefnyddir wrth adfer safleoedd, bydd angen i chi wneud cais am ryddhad adfer safle tirlenwi, y mae'n rhaid ei gymeradwyo cyn y gallwch hawlio'r rhyddhad hwn.

I gael rhagor o wybodaeth, darllenwch ein canllawiau ar ryddhad adfer safle.

Dewiswch 'Cadw', a byddwch yn dychwelyd i dudalen y safle tirlenwi.

Os nad ydych yn derbyn 'cymysgeddau o ronynnau mân' ar y safle tirlenwi, ni fydd angen i chi lenwi’r adran hon. Bydd y system yn rhagosod i sero.

Mae cymysgeddau o ronynnau mân yn ronynnau o ddeunydd a gynhyrchir gan broses trin gwastraff sy'n cynnwys triniaeth fecanyddol.

Dylech gynnwys gwybodaeth yn yr adran hon am gymysgeddau o ronynnau mân.

I gael rhagor o wybodaeth, darllenwch ein canllawiau ar brofion colled wrth danio ochr yn ochr:

• â'n hysbysiad Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân, a'n
• a'n Rheoliadau Treth Gwarediadau Tirlenwi (Gweinyddu)(Cymru) 2018 Rheoliadau 4 a 5

Cyfanswm y gyfradd safonol o brofion a fethwyd neu a gollwyd

Profion colled wrth danio – cyfanswm a fethwyd

Dylech gynnwys cyfanswm y profion colled wrth danio a fethwyd yn y cyfnod hwn a chyfeirio at ein Cymysgeddau cymwys o ddeunyddiau: hysbysiad gronynnau mân ar gyfer y Dreth Gwarediadau Tirlenwi.

Profion colled wrth danio – cyfanswm a gollwyd

Dylech gynnwys cyfanswm y profion colled wrth danio a gollwyd yn y cyfnod hwn a chyfeirio at ein Cymysgeddau cymwys o ddeunyddiau: hysbysiad gronynnau mân ar gyfer y Dreth Gwarediadau Tirlenwi.

Cyfanswm cyfradd safonol

Rhowch y pwysau cyffredinol mewn tunelli ar gyfer pob llwyth, i 2 le degol, lle rydych wedi methu â chydymffurfio ag unrhyw un o'r gofynion yn ein hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'.

Gallai hyn gynnwys:

• profion a gollwyd neu brofion hwyr
• methu gwiriadau gweledol
• gwiriadau cyn-derbyn anghyflawn neu sydd ar goll

Dewiswch 'Cadw', a byddwch yn dychwelyd i dudalen y safle tirlenwi.

Cyfanswm y gyfradd is o brofion a basiwyd

Dylid cofnodi gwybodaeth am unrhyw gymysgeddau o ronynnau mân a waredwyd ar y gyfradd dreth is yma, ar yr amod eich bod wedi bodloni'r gofynion canlynol:

• yn adrannau 16 ac 17 o DTGT
• 1 i 4 yn rheoliad 4 o Reoliadau 2018
• yn ein hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'

Gofynnir i chi ddarparu gwybodaeth ar gyfer pob ffrwd wastraff cyfradd is sy’n gymysgedd o ronynnau mân. Darperir tablau yn rhestru eich cwsmeriaid a'u codau gwastraff EWC 6 digid.

I gael rhagor o wybodaeth, darllenwch ein canllawiau ar brofion colled wrth danio ochr yn ochr â'n hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'.

Dewiswch 'ychwanegu ffrwd wastraff'.

Cynhyrchydd gwastraff

Dewiswch y cynhyrchydd gwastraff perthnasol o'r gwymplen a fydd yn ymddangos os byddwch yn 'dewis opsiwn'.

Cod dosbarthu gwastraff

Dewiswch y cod dosbarthu gwastraff 6 digid perthnasol a neilltuwyd i'r deunydd gwastraff hwn.

Disgrifiad o’r gwastraff

Rhowch ddisgrifiad manwl o'r cymysgeddau gwastraff o ronynnau mân gan ddangos pam eu bod yn perthyn i’r gyfradd dreth is. Os ydych wedi cysylltu â ni a bod gennych ddisgrifiad cytunedig wedi'i nodi yn system TG eich pont bwyso, gellir defnyddio hwn.

A yw hon yn ffrwd wastraff risg uchel neu isel?

Dewiswch a yw'r cymysgeddau o ronynnau mân wedi’u dosbarthu fel rhai risg uchel neu risg isel.

Os bydd cymysgedd o ddeunydd gronynnau mân yn symud rhwng risg uchel a risg isel o fewn y cyfnod, yna bydd angen i chi gofnodi'r wybodaeth ar wahân yn erbyn pob lefel risg.

Er enghraifft:

• sgrin ar gyfer gwybodaeth yn ymwneud â phryd roedd y gymysgedd o ronynnau mân yn risg uchel
• sgrin ar wahân ar gyfer gwybodaeth yn ymwneud â phryd roedd y gymysgedd o ronynnau mân yn risg isel

Dewch o hyd i wybodaeth am y tabl dangosyddion risg yn ein hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'.

Cyfanswm y pwysau

Rhowch gyfanswm y pwysau mewn tunelli ar gyfer y cymysgeddau o ddeunydd gronynnau mân gan y cynhyrchydd gwastraff ar gyfer y cyfnod hwn i 2 le degol.

Profion colled wrth danio - cyfanswm y profion a basiwyd

Nodwch nifer y profion colled wrth danio a basiwyd ar gyfer y cymysgeddau o ronynnau mân.

Profion colled wrth danio – cyfanswm na dderbyniwyd y canlyniadau eto

Nodwch nifer y profion colled wrth danio rydych yn dal i aros am y canlyniadau ar eu cyfer.

I gael rhagor o wybodaeth, darllenwch ein canllawiau ar brofion colled wrth danio ochr yn ochr â'n hysbysiad 'Cymysgeddau cymwys o ddeunyddiau ar gyfer y Dreth Gwarediadau Tirlenwi: gronynnau mân'.

Dewiswch 'Cadw', a byddwch yn dychwelyd i'r sgrin lle gallwch ychwanegu ffrwd wastraff arall.

Dewiswch 'Ychwanegu ffrwd wastraff' i naill ai:

• gofnodi gwybodaeth yn erbyn cymysgedd gwahanol o ddeunydd gronynnau mân
• ychwanegu gwybodaeth ar gyfer yr un cymysgedd o ddeunydd gronynnau mân sydd ar lefel risg wahanol

Pan fyddwch wedi cofnodi'r holl wybodaeth am gymysgeddau o ddeunydd gronynnau mân, dewiswch 'Yn ôl', a bydd hyn yn mynd â chi i dudalen y safle tirlenwi.

Os oes gennych fwy nag un safle tirlenwi, naill ai:

• dewiswch 'Nesaf' ar waelod y sgrin, neu
• dewiswch y tab nesaf ar frig y sgrin, gydag enw eich safle tirlenwi arall

Ailadroddwch y broses uchod.

Unwaith y bydd yr holl wybodaeth wedi'i chwblhau ar gyfer y safle(oedd) tirlenwi yr ydych yn ei weithredu/eu gweithredu o dan eich rhif cofrestru, naill ai:

• dewiswch 'Nesaf’ neu
• dewiswch 'Tab crynodeb'

Fe welwch grynodeb o'r wybodaeth rydych wedi'i nodi ar y ffurflen. Os oes gennych fwy nag un safle tirlenwi, mae'r crynodeb yn cyfuno'r safleoedd tirlenwi unigol.

Mae'r crynodeb yn dangos pwysau (tunelli) a swm (£).

Os oes angen i chi olygu unrhyw wybodaeth, defnyddiwch y tabiau ar gyfer eich safleoedd tirlenwi i lywio'n ôl.

Credyd ansolfedd cwsmer

Faint o gredyd ansolfedd cwsmer ydych chi'n ei hawlio ar gyfer y cyfnod cyfrifyddu hwn?

Dylech gynnwys unrhyw gredydau yr hoffech eu hawlio oherwydd ansolfedd cwsmer ar gyfer y cyfnod cyfrifyddu. Caiff hyn ei ddidynnu o'r ffigur terfynol sy'n ddyledus ar gyfer y dreth yng nghyfrifiad y system a gall fod yn destun gwiriadau gennym ni.

Cyfeiriwch at ein canllawiau ar Benderfynu faint o Dreth Gwarediadau Tirlenwi sy'n daladwy (DTGT/4190 i 4280)

Nid oes angen i chi gynnwys arwydd £. Nodwch yn y fformat 1.00.

Argraffu neu gadw crynodeb o’r dreth

Adolygwch y wybodaeth rydych chi wedi'i nodi.

Ar y pwynt yma, gallwch:

• argraffu'r ffurflen
• ei chadw'n electronig, er enghraifft drwy dde clicio a dewis 'Argraffu i PDF'

Efallai y bydd angen i chi ddewis 'Argraffu' neu 'Cadw' eto os oes ail ffenestr wedi agor. Gall weithio'n wahanol yn dibynnu ar y porwr gwe rydych chi'n ei ddefnyddio.

Os oes gennych gyfnodau cyfrifyddu safonol

A ydych yn cytuno â chyfrifiad y dreth?

Ydw

Dewiswch 'ydw' os yw'r wybodaeth a gofnodwyd yn gywir a'ch bod yn cytuno â'r cyfrifiad treth a ddarparwyd. Dim ond hyd at 2 le degol y bydd y system yn talgrynnu.

Gallwch argraffu'r ffurflen neu ei chadw'n electronig ar y pwynt yma.

Dewiswch y 'Datganiad' a 'Cyflwyno eich ffurflen dreth'.

Nac ydw

Os nad ydych yn cytuno â'r cyfrifiad ac yr hoffech gywiro'r wybodaeth rydych wedi'i chofnodi, defnyddiwch y tabiau i newid gwybodaeth ar gyfer pob safle tirlenwi.

Os ydych wedi cofnodi'r wybodaeth gywir ond nad ydych yn cytuno â'r ffigur treth a gyfrifwyd, dewiswch 'nac ydw'. Os gwnewch hyn, rhowch wybod i'ch rheolwr cysylltiadau cwsmeriaid.

Dewiswch 'Newid eich ffurflen dreth'.

Bydd angen i chi gyfrifo eich ffigur eich hun drwy nodi cyfanswm y ffigur treth ar gyfer y gyfradd dreth safonol a’r gyfradd dreth is. Rhowch y ffigur hwn i 2 le degol.

Dylai'r ffigur hwn ystyried unrhyw ryddhadau neu ostyngiadau a gymhwysir.

Unwaith y byddwch wedi cyflwyno'ch ffurflen, gallwch adolygu crynodeb o'r data rydych wedi'i gofnodi. I gael gafael ar fanylion cyflawn y wybodaeth rydych wedi'i nodi naill ai:

• cysylltwch â'ch rheolwr cysylltiadau cwsmeriaid, neu
• cofnodwch hyn wrth i chi symud ymlaen drwy sgriniau'r ffurflen

Os oes gennych gyfnodau cyfrifyddu ansafonol

Os ydych wedi cofnodi'r wybodaeth gywir ond nad ydych yn cytuno â'r ffigur treth a gyfrifwyd oherwydd bod eich cyfnod cyfrifyddu’n rhychwantu cyfraddau treth gwahanol, dewiswch 'Nac ydw'.

Dewiswch 'Newid eich ffurflen dreth'.

Bydd angen i chi gyfrifo eich ffigur eich hun drwy nodi cyfanswm y ffigur treth ar gyfer y gyfradd dreth safonol a’r gyfradd dreth is. Rhowch y ffigur hwn i 2 le degol.

Dylai'r ffigur hwn ystyried unrhyw ryddhadau neu ostyngiadau a gymhwysir.

Dewiswch 'Cadw', a byddwch yn dychwelyd i dudalen y crynodeb.

Ar y pwynt yma, gallwch:

• argraffu'r ffurflen
• ei chadw'n electronig, er enghraifft drwy dde clicio a dewis 'Argraffu i PDF' 

Efallai y bydd angen i chi ddewis 'Argraffu' neu 'Cadw' eto os oes ail ffenestr wedi agor. Gall weithio'n wahanol yn dibynnu ar y porwr gwe rydych chi'n ei ddefnyddio.

Ydw

Os ydych yn cytuno â'r crynodeb o’r dreth sy’n ddyledus, dewiswch y 'Datganiad' a 'Cyflwyno eich ffurflen dreth'.

Unwaith y byddwch wedi cyflwyno'ch ffurflen, gallwch adolygu crynodeb o'r data rydych wedi'i gofnodi. I gael gafael ar fanylion cyflawn y wybodaeth rydych wedi'i nodi naill ai:

• cysylltwch â'ch rheolwr cysylltiadau cwsmeriaid, neu
• cofnodwch hyn wrth i chi symud ymlaen drwy sgriniau'r ffurflen

Ar ôl cyflwyno'ch ffurflen, bydd angen i chi dalu’r Dreth Gwarediadau Tirlenwi sy’n ddyledus.