Data a gwybodaeth i gefnogi dysgu a gwelliant: ar gyfer y cyhoedd

Diben yr ymgynghoriad

Nod y ddogfen hon yw amlinellu ein polisi ar y defnydd a wneir o ddata ysgolion a dysgwyr yr ydym eisoes yn eu casglu a'u prosesu'n gyfreithlon. Mae hefyd yn nodi'r disgwyliadau i ysgolion ddarparu gwybodaeth.

Drwy gydol yr ymgynghoriad hwn, pan welwn y term ‘disgwyl’ neu ‘disgwyliad’, mae am fod rhanddeiliaid wedi gofyn i Lywodraeth Cymru roi cyfarwyddyd ar ddefnyddio data a gwybodaeth i gefnogi dysgu a gwelliant. Bwriedir i'r termau hyn ddisgrifio cyngor Llywodraeth Cymru, nid gofynion cyfreithiol. Yn unol â hynny, mae Llywodraeth Cymru yn argymell yn gryf y dylai rhanddeiliaid ddilyn y dull gweithredu hwn. Bydd hyn yn ein helpu i gydweithio ac i gysoni'r hyn rydym yn ei werthfawrogi ar gyfer ein dysgwyr.

Ar gyfer pwy mae'r ymgynghoriad hwn wedi'i anelu?

Rydym yn cynnal yr ymgynghoriad hwn mewn dwy fersiwn, pob un wedi'i theilwra ar gyfer grŵp penodol o randdeiliaid. Mae'r ddogfen hon yn cefnogi'r fersiwn sydd wedi'i hanelu at y cyhoedd, gan gynnwys rhieni a gofalwyr, dysgwyr ac unrhyw un arall sydd â diddordeb ym mhwnc yr ymgynghoriad hwn.

Mae fersiwn ar wahân, sydd wedi'i chynllunio i fod yn fwy manwl ar gyfer cynulleidfa arbenigol, wedi'i hanelu at y rhai sy'n gweithio yn y system ysgolion, fel ymarferwyr, arweinwyr, awdurdodau lleol, consortia rhanbarthol a'r rhai sy'n gweithio ochr yn ochr ag ysgolion, sefydliadau yr ydym yn cyfeirio atynt fel partneriaid, fel Estyn, Cymwysterau Cymru, Cymdeithas Llywodraeth Leol Cymru (CLlLC).

Pa ddata a gwybodaeth sydd dan sylw yma?

Drwy'r ymgynghoriad hwn, rydym yn cyfeirio at ddata a gwybodaeth ond rydym am fod yn glir nad oes unrhyw fwriad gennym i ddiwygio deddfwriaeth gyfredol i ehangu na newid y trefniadau presennol i gasglu data ar gyfer gofynion adrodd statudol. Fodd bynnag, byddwn yn ystyried y fframwaith deddfwriaethol er mwyn sicrhau ei fod yn cyd-fynd â'n sefyllfa o ran polisi (h.y. yr egwyddorion a nodir yn yr ymgynghoriad hwn) a bod unrhyw ofynion data newydd sy'n effeithio ar y ddeddfwriaeth yn cael eu gwerthuso yn erbyn y polisi hwn.

Cyfnod yr ymgynghoriad

Byddwn yn agor yr ymgynghoriad hwn am gyfnod o naw wythnos. Credwn fod yr amserlen hon yn ddigonol i'r ymatebwyr roi ystyriaeth lawn i'n cynigion a chyflwyno eu hymatebion. Mae ein cyfarwyddyd wedi bod yn glir ers sawl blwyddyn ac mae prosesau ymgysylltu helaeth â rhanddeiliaid wedi llywio'r cynigion hyn. Bydd y cyfnod ymgynghori hwn hefyd yn ein galluogi i gadarnhau trefniadau cyn gynted â phosibl yn ystod tymor yr haf 2025. Bydd hyn yn rhoi cymaint o amser â phosibl i'r rhai sy'n gweithio yn y system ysgolion a phartneriaid fyfyrio ar y trefniadau a gadarnhawyd, cyfrannu at gamau datblygu dilynol a pharatoi i newid i'r trefniadau newydd a fydd yn dechrau yn nhymor yr haf 2027.

Rhaid i'n dull o ddefnyddio data a gwybodaeth i gefnogi dysgu a gwelliant fod yn sail i uchelgeisiau ein diwygiadau addysg. Dylai fod yn gyson ag ethos y Cwricwlwm i Gymru a'n Fframwaith Gwella Cenedlaethol ategol, gan ein helpu i gyflawni amcanion ym mhob rhan o'r Rhaglen Lywodraethu ac mewn meysydd polisi strategol ar yr un pryd, gan gynnwys ein huchelgeisiau o ran tegwch, Cymraeg 2050: Miliwn o Siaradwyr a Llesiant Cenedlaethau'r Dyfodol.

Ar beth rydym yn ymgynghori?

Ein dull cyffredinol o ddefnyddio data a gwybodaeth yn y system ysgolion a chyfres o egwyddorion i fod yn sail i hyn

Rydym yn amlinellu ein dull o ddefnyddio data a gwybodaeth er mwyn sicrhau cyd-ddealltwriaeth o'i ddefnydd ac i roi cyfarwyddyd ar sut rydym yn disgwyl i eraill ei ddefnyddio. Er mwyn gwneud hyn, rydym wedi datblygu cyfres o egwyddorion canllaw. Rydym yn ceisio adborth ar ba mor dda y mae'r egwyddorion hyn yn cyfleu ein nodau. Fel y nodwyd uchod, diben hyn yw rhoi sicrwydd am y ffordd y bydd Llywodraeth Cymru yn defnyddio'r data a gesglir ganddi eisoes. Nod yr egwyddorion hyn yw cyfleu'r ffaith ein bod yn symud i ffwrdd oddi wrth ddull “lle mae llawer yn y fantol” o ddefnyddio data, i ddull sy'n canolbwyntio ar gefnogi cynnydd dysgwyr unigol yn lle hynny.

Cynigion Fframwaith Dangosyddion yr Hawl i Ddysgu 14 i 16

Rydym yn ceisio safbwyntiau ar Fframwaith Dangosyddion yr Hawl i Ddysgu 14 i 16 er mwyn cefnogi dysgu 14 i 16 o dan y Cwricwlwm i Gymru. Rydym am wybod i ba raddau y mae rhanddeiliaid yn credu bod y cynigion hyn yn cyd-fynd â'n nodau polisi, a chasglu adborth ar strwythur y fframwaith. 

Mae'r cynigion a amlinellir yn yr ymgynghoriad hwn yn ymwneud â threfniadau adrodd nad ydynt yn rhan o'n hallbynnau ystadegol swyddogol. Byddwn yn ceisio safbwyntiau ar sut mae data ysgolion a dysgwyr yn cael eu cynnwys mewn cyhoeddiadau ystadegau swyddogol yn y dyfodol agos, fel rhan o'n camau nesaf.

Cefnogi gwelliant ar gyfer dysgu o dan y Cwricwlwm i Gymru

Mae Llywodraeth Cymru a'r system addysg yn ymrwymedig i ddod yn system hunanwella drwy gydweithio, partneriaethau a chymorth cydweithredol. Mae data a gwybodaeth yn chwarae rôl hanfodol yn hyn o beth, ond mae'r sbardunau allweddol yn ymwneud â phartneriaid a Llywodraeth Cymru yn cydweithio'n effeithiol, gan ganolbwyntio ar bob agwedd ar wella dysgu a chodi safonau mewn addysg. 

Mae ein Fframwaith Gwella Cenedlaethol yn arwain y gwaith hwn, ac mae ein Rhaglen Bartneriaeth Gwella Ysgolion barhaus yn cefnogi cydweithio pwrpasol ar bob lefel o'r system. Mae hyn yn galluogi hunanwerthuso effeithiol drwy ymarfer sy'n canolbwyntio ar y dysgwr, wedi'i lywio gan dystiolaeth ac yn seiliedig ar ymholi o fewn ysgolion a rhyngddynt, ac mewn partneriaeth ag awdurdodau lleol. 

Mae ein canllawiau Gwella Ysgolion, a gyhoeddwyd yn 2022, yn amlinellu ein nodau, sef:

• cynyddu'r defnydd o'r amrywiaeth ehangaf a chyfoethocaf posibl o wybodaeth i lywio gwaith hunanwerthuso a gwella yng nghyd-destun ysgolion eu hunain
• egluro'r ffordd y caiff gwybodaeth ei defnyddio at ddibenion atebolrwydd, fel na fydd hyn yn atal ysgolion rhag gwella nac yn arwain at ymddygiadau negyddol
• ehangu'r amrywiaeth o wybodaeth sydd ar gael i'r cyhoedd am ysgolion a'r system ehangach, a gwella ansawdd yr wybodaeth honno, er mwyn cynyddu tryloywder a hyder y cyhoedd

Hefyd, gwnaethom gyhoeddi ein canllawiau statudol ar ddysgu 14 i 16 o dan y Cwricwlwm i Gymru yn ddiweddar. Mae'r canllawiau hyn yn mynegi ein bwriad i ofynion gwybodaeth a threfniadau adrodd gyd-fynd â blaenoriaethau a nodau'r Hawl i Ddysgu ar gyfer dysgwyr 14 i 16 oed (yr hawl i ddysgu 14 i 16). Gwnaethom ymrwymo i ymgynghori ar y cynigion hyn ynghylch gwybodaeth, gan roi cyfeiriad clir o ran ein disgwyliadau ar gyfer defnyddio a chyhoeddi data perthnasol ar lefel ysgol.

Pam mae angen inni ddiffinio ein dull o ddefnyddio data a gwybodaeth i gefnogi dysgu a gwelliant?

Ein nodau

Mae data a gwybodaeth yn chwarae rhan allweddol mewn prosesau gwerthuso, gwella ac atebolrwydd. Fodd bynnag, er mwyn cefnogi gwelliant mewn dysgu yn wirioneddol, rhaid iddynt fod yn briodol i'w defnyddio a chael eu defnyddio'n briodol. Byddwn yn aml yn cyfeirio at y berthynas rhwng beth yw'r data a ddefnyddir a sut y cânt eu defnyddio fel yr ‘ecosystem wybodaeth’.

Rydym yn cydnabod bod angen i Lywodraeth Cymru osod disgwyliadau clir ar gyfer defnyddio data ac unrhyw ofynion penodol. Bydd hyn yn helpu i feithrin ffocws ar yr hyn sy'n bwysig a ble y gall helpu i sbarduno gwelliannau ar gyfer ein dysgwyr, gan gefnogi ein dyheadau polisi.

Mae gwaith ymchwil diweddar a gomisiynwyd gan Lywodraeth Cymru ar ddatblygu ecosystem data a gwybodaeth newydd wedi llywio'r gwaith o ddatblygu ein cynlluniau, ochr yn ochr ag ymgysylltu â'n partneriaid. 

Ein nod yw hyrwyddo dull cytbwys gan ddefnyddio pob math o ddata gwybodaeth, gan ganolbwyntio ar ganfod a deall materion a ffactorau sylfaenol er mwyn diwallu anghenion amrywiol ein dysgwyr a'n hysgolion. Rydym am i ddata a gwybodaeth gael eu defnyddio mewn ffordd sy'n cefnogi ymdrechion i sicrhau'r gorau ar gyfer ein dysgwyr a'n dinasyddion ac sy'n helpu ein gweithlu i gyflawni hyn. Rydym hefyd yn awyddus i helpu'r cyhoedd i ddeall beth sy'n digwydd mewn ysgolion drwy roi darlun mwy ystyrlon a chyflawn o ysgolion mewn ffordd sy'n hawdd ei deall. 

Dylai ein ffocws ar ddata gefnogi dealltwriaeth heb roi baich ychwanegol ar y gweithlu neu sbarduno ymddygiadau negyddol. 

Wrth i'r Cwricwlwm i Gymru ymwreiddio, rydym am i'n dull o ddefnyddio data a gwybodaeth gynnal cydbwysedd hirdymor ym mhob rhan o'r system. Mae'n bwysig bod yn glir ynghylch ein nodau, ein hegwyddorion a sut y byddwn yn cyflawni hyn.

Dylid defnyddio data, gwybodaeth a thystiolaeth ar gyfer amrywiaeth o ddibenion, ac mae gan randdeiliaid gwahanol eu hanghenion penodol eu hunain o ran data a gwybodaeth a fydd yn amrywio yn dibynnu ar y diben y cânt eu defnyddio ar ei gyfer. Mae gwybodaeth ansoddol a meintiol yn werthfawr, a phan gânt eu defnyddio gyda'i gilydd, maent yn cynnig darlun cyflawn o ysgolion. Mae'n hanfodol bod pawb yn sicrhau y caiff data eu defnyddio mewn ffordd sy'n sicrhau mai'r dysgwr sydd wrth wraidd y broses o wneud penderfyniadau bob amser.

Egwyddorion yr ecosystem wybodaeth

Rydym yn cynnig yr egwyddorion canlynol i fod yn sail i'n dull o ddefnyddio data i gefnogi'r broses o wella dysgu:

1. Dull sy'n canolbwyntio ar y dysgwr: ar y dysgwyr y bydd ein holl ffocws o hyd. Eu hanghenion, eu cynnydd a'u llesiant sy'n arwain ein penderfyniadau. 
2. Cymorth i'r Gweithlu: drwy osod disgwyliadau clir ynglŷn â defnyddio data, ein nod yw grymuso addysgwyr i gefnogi dysgwyr yn well.
3. Cyfannol: Ni all yr un metrig unigol ddiffinio llwyddiant. Rydym yn ystyried amrywiaeth eang o ffactorau, gan osgoi gorddibyniaeth ar fesurau unigol.
4. Materion Cyd-destunol: mae data'n fwy ystyrlon yn eu cyd-destun. Rydym yn sicrhau bod gwybodaeth yn berthnasol, yn amserol, o safon uchel, ac yn eu cyd-destun er mwyn rhoi darlun cyflawn o ysgol ac ystyried deilliannau mewn ffordd fwy teg.
5. Effeithlonrwydd a Symlrwydd: mae symleiddio gofynion yn lleihau beichiau gweinyddol, gan alluogi addysgwyr i ganolbwyntio ar yr un sydd bwysicaf. 
6. Hyblygrwydd: mae ein dull yn parchu anghenion unigolion mewn amrywiaeth o leoliadau. Nid yw'r un ateb yn addas i bawb.
7. Cyflwyniad Hawdd ei Ddeall: dylai data a gwybodaeth fod yn hygyrch ac yn ddealladwy. Mae eu dangos yn glir mewn ffordd weledol yn helpu i wneud dewisiadau ar sail gwybodaeth.
8. Disgrifiadol, Nid Beirniadol: disgrifio a wnawn, yn hytrach na gwerthuso. Mae dealltwriaeth wrthrychol yn llywio camau gweithredu.
9. Adrodd a Rhannu: mae data'n helpu ysgolion a gwasanaethau gwella i gydweithio.
10. Grymuso: mae ysgolion yn defnyddio data mewn modd deallus er mwyn llywio hunanwerthuso a gwelliant parhaus.
11. Chwilfrydedd a Dealltwriaeth: mae data'n esgor ar archwilio ac yn cyfoethogi ymholiadau, gan arwain at ddealltwriaeth ddyfnach a thriongli canfyddiadau.
12. Cyhoeddi Meddylgar: rydym yn pwyso a mesur y canlyniadau cyn rhannu data'n gyhoeddus, gan ddiogelu dysgwyr ac ysgolion.

Cefnogi dysgu 14 i 16 o dan y Cwricwlwm i Gymru

Mae ein rhaglen o weithgarwch i sicrhau defnydd effeithiol o ddata a gwybodaeth yn cwmpasu'r holl ystod polisi addysg. Rydym yn blaenoriaethu'r maes hwn er mwyn cynnig cyfeiriad ar ôl i'r canllawiau statudol ar ddysgu 14 i 16 o dan y Cwricwlwm i Gymru gael eu cyhoeddi. Gwneir hyn er mwyn paratoi i garfan gyntaf o ddysgwyr y Cwricwlwm i Gymru gyrraedd Blwyddyn 11 a chyn i'r cymwysterau Gwnaed yng Nghymru diwygiedig ar gyfer dysgwyr 14 i 16 oed gael eu cyflwyno. 

Rydym wedi ymrwymo i gyflwyno dangosyddion sy'n ategu Dysgu 14 i 16 o dan y Cwricwlwm i Gymru yn lle'r mesurau Cyfnod Allweddol 4 Interim presennol. Rydym yn deall bod ein partneriaid a'r cyhoedd yn awyddus i wybod sut mae Llywodraeth Cymru yn bwriadu cyflwyno data ysgolion yn y dyfodol. Felly, mae'r ymgynghoriad hwn yn ystyried y data a'r wybodaeth rydym yn cynnig y dylid eu cyhoeddi'n rheolaidd am ysgolion drwy Fy Ysgol Leol neu unrhyw lwyfan cyhoeddus o'r fath yn y dyfodol. 

Wrth inni ystyried yr angen am ddata a gwybodaeth yn ystod cyfnodau cynnar y Cwricwlwm i Gymru, byddwn yn sicrhau bod hynny'n cyd-fynd â'r hyn rydym yn ei werthfawrogi drwy gydol addysg dysgwr.

Yr Hawl i Ddysgu 14 i 16

Mae'r canllawiau ar ddysgu 14 i 16 yn nodi'r Hawl i Ddysgu 14 i 16, sy'n pwysleisio amrywiaeth eang o weithgareddau dysgu a chyfleoedd i bobl ifanc. Mae hyn yn eu cefnogi wrth iddynt wneud cynnydd tuag at gyflawni'r pedwar diben, nesáu at ddiwedd eu haddysg statudol, cwblhau cymwysterau a pharatoi ar gyfer y cam nesaf yn eu bywydau, boed yn addysg bellach, hyfforddiant neu gyflogaeth.

Mae'r canllawiau ar ddysgu 14 i 16 yn nodi y dylai ysgolion sicrhau bod pob dysgwr yn gallu dangos a chyfleu'r hyn y mae wedi'i ddysgu, ei gynnydd a'i gyflawniadau ym mhob un o bedair elfen yr hawl i ddysgu erbyn iddo gwblhau addysg orfodol yn 16 oed. Y pedair elfen hyn yw:

• Cymwysterau mewn llythrennedd a rhifedd.
• Cymwysterau i annog ehangder.
• Dysgu a phrofiadau ehangach ym mhob rhan o'r cwricwlwm.
• Myfyrio ar ddysgu a chynnydd a chynllunio ôl-16.

Bydd hawl pob dysgwr yn cynnwys amrywiaeth o weithgareddau dysgu, profiadau a chyflawniadau ym mhob un o'r elfennau hyn. 

Ein nod yw defnyddio data a gwybodaeth mewn ffordd sy'n helpu ysgolion i gynnig arlwy cynhwysfawr i ddysgwyr, gan gydbwyso'r ddarpariaeth rhwng yr elfennau heb ganolbwyntio'n ormodol ar un agwedd. Mae'r dull hwn hefyd yn helpu eraill i feithrin dealltwriaeth gyflawn o'r dysgu 14 i 16 mewn ysgol.

Cwmpas y Fframwaith 14 i 16

Rydym yn cynnig Fframwaith Dangosyddion yr Hawl i Ddysgu 14 i 16 (y Fframwaith 14 i 16) sy'n cyd-fynd yn llwyr â'r Hawl i Ddysgu 14 i 16:

• Disgwyliadau o ran cyhoeddi: mae'r cynnig hwn yn amlinellu'r hyn rydym yn disgwyl i Lywodraeth Cymru ei gyhoeddi'n rheolaidd am ysgolion. 
• Data a gwybodaeth ehangach am ysgolion: dim ond i ddata ar ddysgu 14 i 16 y mae'r Fframwaith hwn yn berthnasol. Nid yw'n cwmpasu'r amrywiaeth lawn o ddata y credwn y dylai Llywodraeth Cymru ei chyhoeddi am ysgol, neu y byddem yn disgwyl i ysgolion ei darparu.
• Cynnwys Dysgwyr Addysg Heblaw yn yr Ysgol: wrth inni ddatblygu cynigion, byddwn yn ystyried sut i sicrhau y caiff dysgwyr sy'n cael addysg heblaw yn yr ysgol eu cynnwys yn ein trefniadau adrodd hefyd.

Beth sydd wedi llywio'r cynigion ar gyfer y Fframwaith 14 i 16?

Rydym wedi ffurfio'r cynigion canlynol yn unol â'n dull o ddefnyddio data a gwybodaeth. Cafodd y cynigion hyn eu llywio gan ein nodau polisi, ymchwil sydd ar gael (gan gynnwys ymchwil a gaiff ei chomisiynu'n benodol sy'n ymwneud â chyfranogiad ysgolion, dysgwyr, partneriaid a rhieni a (neu) gofalwyr) a'n hymgysylltu parhaus ag amrywiol randdeiliaid, gan gynnwys arweinwyr ac ymarferwyr mewn ysgolion a chynrychiolwyr awdurdodau lleol, consortia rhanbarthol, Cymdeithas Llywodraeth Leol Cymru (CLlLC), Cymwysterau Cymru, CBAC, Estyn ac undebau arweinwyr ysgolion.

Fframwaith Dangosyddion yr Hawl i Ddysgu 14 i 16 (y Fframwaith 14 i 16)

Beth sydd yn y Fframwaith 14 i 16?

Mae'r fframwaith yn cynnig cymysgedd o drefniadau adrodd ar gyfer data a gesglir gan Lywodraeth Cymru a disgwyliadau i bob ysgol uwchradd sicrhau bod data a gwybodaeth ar gael i'r cyhoedd.

Nodweddion trawsbynciol sy'n sail i'n dull o adrodd ar ddata dysgu 14 i 16

1. Dealltwriaeth Gynhwysfawr: rhaid i ddata a gwybodaeth helpu i feithrin dealltwriaeth o ehangder, dyfnder, lefel a graddfa'r dysgu mewn ysgol ac ymhlith gwahanol grwpiau o ddysgwyr. Ar gyfer dysgwyr 14 i 16 oed, mae hyn yn cynnwys gweithio tuag at ennill cymwysterau, ond nid yw wedi'i gyfyngu i hynny.
2. Cefnogi pob dysgwr: rhaid i ddata a gwybodaeth helpu i feithrin dealltwriaeth o ddysgu ym mhob grŵp o ddysgwyr a chynnydd mewn perthynas â'u potensial.
3. Hunanwerthuso parhaus: rhaid i ddata a gwybodaeth gefnogi hunanwerthuso drwy gydol y cyfnod dysgu 14 i 16 ac ar draws ystod oedran ysgol, nid dim ond ar ddiwedd Blwyddyn 11.
4. Llwyddiant Cyd-destunol: rhaid i ddata a gwybodaeth gefnogi dealltwriaeth mewn cyd-destun ar lefel ysgol, gan gynnig tryloywder mewn ffordd deg. Mae cyflawniad yn gymharol i bob dysgwr, ac i'r cyd-destun a'r heriau sy'n wynebu pob ysgol. Felly, ni chaiff data a gwybodaeth eu cyflwyno mewn ffordd sy'n awgrymu llwyddiant neu fethiant, ond byddant yn cyfleu ble mae gwerth wedi cael ei ychwanegu at y ddarpariaeth ar gyfer dysgwyr. (Caiff cymaryddion perthnasol a ffactorau cyd-destunol eu datblygu gydag ysgolion a phartneriaid yn ein camau nesaf.)
5. Hygyrchedd: rhaid i ddata a gwybodaeth fod yn hygyrch i wahanol gynulleidfaoedd. Ni chaiff deilliannau cymwysterau eu troi'n sgoriau pwyntiau. Mae'r cynnig llawn o gymwysterau diwygiedig ar gyfer dysgwyr 14 i 16 oed yn cyflwyno nifer o gymhlethdodau na ellir eu cymhwyso at y trefniadau pwyntiau presennol.
6. Tryloywder: rhaid i ddata a gwybodaeth gynorthwyo tryloywder. Ni chaiff deilliannau dysgu eu cyflwyno ar ffurf mesur cyfansawdd lle y gall amrywiadau gael eu cuddio.
7. Naratif Clir: byddwn yn cyflwyno naratif clir ynglŷn â'r data a'r wybodaeth yr adroddir arnynt, gan alluogi'r cyhoedd i ddeall disgwyliadau mewn perthynas â defnyddio data a'r cysylltiad rhyngddynt â'n gwerthoedd (yr Hawl i Ddysgu 14 i 16 a'r Cwricwlwm i Gymru).

Ble a sut y caiff data a gwybodaeth y Fframwaith 14 i 16 eu cyflwyno?

Byddwn yn cyflwyno set lawn o ddata a gwybodaeth ar lwyfan cyhoeddus, ar gyfer pob ysgol uwchradd ac ysgol ganol, wedi'i rhannu rhwng pedair elfen yr Hawl i Ddysgu 14 i 16. Bydd hyn yn rhan o gasgliad ehangach o wybodaeth a fydd ar gael am bob ysgol a gynhelir yng Nghymru. Ar hyn o byd, rydym yn defnyddio Fy Ysgol Leol er mwyn galluogi'r cyhoedd i weld data a gwybodaeth am bob ysgol. Mae gweddill yr adran hon yn nodi sut rydym yn bwriadu cyflwyno'r wybodaeth hon a'n disgwyliadau i ysgolion ddarparu'r wybodaeth drwy eu sianelau eu hunain.

Defnyddio data cymwysterau yn y Fframwaith 14 i 16

1. Cofrestriadau a Dyfarniadau mewn Cymwysterau: byddwn yn adrodd ar gofrestriadau a deilliannau dyfarniadau mewn cymwysterau.
2. Adroddiadau ar Gymwysterau Unigol: ni fyddwn yn defnyddio mesur i adrodd ar gymysgedd o ddeilliannau cymwysterau gwahanol. Yn lle hynny, byddwn yn adrodd ar ddeilliannau ym mhob cymhwyster unigol.
3. Adroddiadau Cyd-destunol: byddwn yn adrodd ar ddeilliannau mewn cymwysterau mewn ffordd gyd-destunol, gan ddefnyddio cymaryddion perthnasol wedi'u datblygu mewn partneriaeth â rhanddeiliaid. Byddwn yn ceisio cynnwys cymharydd deilliannau disgwyliedig sy'n seiliedig ar fodel ystadegol wedi'i lywio gan ffactorau anfantais economaidd-gymdeithasol. 
4. Deall deilliannau grwpiau o ddysgwyr a phatrymau dros amser: byddwn yn ceisio rhoi cipolwg ar ddysgu ar draws grwpiau o ddysgwyr â nodweddion gwahanol a dadansoddiad dros amser. 
5. Adrodd ar ystod graddau: byddwn yn adrodd ar ddeilliannau cymwysterau ar ffurf canrannau'r dysgwyr a enillodd bob ystod graddau (e.e. A*, A* i A, A* i B,…A* i G ar gyfer cymwysterau TGAU, neu A*A*, neu A*A* i AA, A*A* i BB,…A*A* i GG ar gyfer cymwysterau TGAU dyfarniad dwbl) ar gyfer pob dyfarniad y bydd dysgwr yn y garfan yn ei ennill, gan ddefnyddio'r ystod graddau berthnasol ar gyfer pob cymhwyster.
6. Cynnwys cymwysterau: caiff yr holl gymwysterau diwygiedig a gymeradwywyd ac a ddynodwyd (gan Cymwysterau Cymru fel y corff rheoleiddio) ar gyfer dysgwyr 14 i 16 oed yng Nghymru (hyd at lefel 2) eu cynnwys mewn adroddiadau pan fydd y canlynol yn wir:
   1. disgwylir i'r mwyafrif o ddysgwyr gael eu cofrestru fel y nodir yn y Canllawiau ar Ddysgu 14 i 16, neu
   2. mae dysgwr yn y garfan wedi cael ei gofrestru.
7. Osgoi camgynrychioli cymwysterau â llai o gofrestriadau: pan gaiff llai na 50 o ddysgwyr eu cofrestru ar gyfer cymhwyster, ni chaiff y deilliannau eu cynnwys mewn adroddiadau gan fod patrymau deilliannau yn debygol o fod yn ansefydlog, gan atal dealltwriaeth wirioneddol o'r data. Byddwn yn nodi y gellir cysylltu ag ysgol am ragor o wybodaeth ar gyfer unrhyw bwnc â lefel cofrestriadau is. Byddwn yn adolygu addasrwydd y lleiafswm hwn o gofrestriadau dros amser.

Crynodeb o ddangosyddion y Fframwaith 14 i 16 i'w cyhoeddi

Cymwysterau mewn llythrennedd a rhifedd

• Trosolwg o'r cofrestriadau ar gyfer cymwysterau perthnasol ym mhob maes pwnc (Cymraeg, Saesneg a Mathemateg a Rhifedd) sydd wedi'i gynnwys yn yr elfen hon (cyhoeddiad Llywodraeth Cymru).
• Cofrestriadau a dyfarniadau ym mhob ystod graddau (yn amodol ar lefelau digonol o ddysgwyr yn cofrestru iddo fod yn ymarferol adrodd ar ddyfarniadau) yr adroddir arnynt ar wahân ar gyfer pob cymhwyster perthnasol sydd wedi'i gynnwys yn yr elfen hon (cyhoeddiad Llywodraeth Cymru).

Cymwysterau i annog ehangder

• Trosolwg o'r cofrestriadau ar gyfer cymwysterau perthnasol yn y maes pwnc gwyddoniaeth sydd wedi'i gynnwys yn yr elfen hon (cyhoeddiad Llywodraeth Cymru).
• Cofrestriadau a dyfarniadau ym mhob ystod graddau (yn amodol ar lefelau digonol o ddysgwyr yn cofrestru iddo fod yn ymarferol adrodd ar ddyfarniadau) yr adroddir arnynt ar wahân ar gyfer pob cymhwyster TGAU, TAAU a Sylfaen perthnasol sydd wedi'i gynnwys yn yr elfen hon (cyhoeddiad Llywodraeth Cymru).
• Trosolwg o'r cofrestriadau ar gyfer gwahanol fathau o gymwysterau (cyhoeddiad Llywodraeth Cymru).

Dysgu a phrofiadau ehangach ym mhob rhan o'r cwricwlwm

• Cofrestriadau a dyfarniadau ym mhob ystod graddau (yn amodol ar lefelau digonol o ddysgwyr yn cofrestru iddo fod yn ymarferol adrodd ar ddyfarniadau) ar gyfer y Prosiect Personol (cyhoeddiad Llywodraeth Cymru).
• Cofrestriadau a dyfarniadau ym mhob ystod graddau (yn amodol ar lefelau digonol o ddysgwyr yn cofrestru iddo fod yn ymarferol adrodd ar ddyfarniadau) yr adroddir arnynt ar wahân ar gyfer pob cymhwyster Cyfres Sgiliau perthnasol sydd wedi'i gynnwys yn yr elfen hon (cyhoeddiad Llywodraeth Cymru).
• Gwybodaeth am ddysgu mewn addysg cydberthynas a rhywioldeb a chrefydd, gwerthoedd a moeseg sy'n rhan o gwricwlwm ysgol (cyhoeddiad ysgol).
• Gwybodaeth am y cyfleoedd a'r cyfranogiad cwricwlaidd a dysgu ehangach mewn ysgol (cyhoeddiad ysgol).

Myfyrio ar ddysgu a chynnydd a chynllunio ôl-16

Effeithiolrwydd a lefelau ymgysylltu dysgwyr

• Gwybodaeth am helpu dysgwyr i ddysgu'n fwyfwy effeithiol (cyhoeddiad ysgol).
• Gwybodaeth am gyfleoedd ac effaith Llais y Dysgwr a chefnogi Llesiant mewn ysgol (cyhoeddiad ysgol).
• Lefelau presenoldeb ar gyfer dysgwyr Blwyddyn 10 ac 11 (cyhoeddiad Llywodraeth Cymru).
• Lefelau absenoldeb mynych a dysgwyr sy’n absennol yn gyson ym Mlwyddyn 10 ac 11 (cyhoeddiad Llywodraeth Cymru).
• Symudiadau grŵp blwyddyn dysgwyr rhwng Blwyddyn 10 a Blwyddyn 11 (yn cael ei ystyried) (cyhoeddiad Llywodraeth Cymru).

Cynllunio Ôl-16

• Gwybodaeth am gynllunio Ôl-16 a chynllunio ar gyfer pontio mewn ysgol (cyhoeddiad ysgol).
• Cyrchfannau dysgwyr Blwyddyn 11 (yn cael ei ystyried) (cyhoeddiad Llywodraeth Cymru).
• Dysgwyr Blwyddyn 11 heb unrhyw gymwysterau (cyhoeddiad Llywodraeth Cymru).

Amseru'r broses o roi'r Fframwaith 14 i 16 ar waith

Ar ôl i'r ymgynghoriad hwn ddod i ben, byddwn yn ystyried yr ymatebion ac yn cadarnhau'r trefniadau a'r camau nesaf yn ystod tymor yr haf 2025. Yn dilyn hyn, byddwn yn gweithio gyda'n partneriaid i fireinio cynigion, cadarnhau'r manylion sylfaenol, a datblygu systemau adrodd i gefnogi prosesau hunanwerthuso a gwneud data ysgolion yn hygyrch i'r cyhoedd. Byddwn yn adrodd yn unol â'r trefniadau diwygiedig hyn wrth i'r dysgwyr yng ngharfan Blwyddyn 11 gyntaf y Cwricwlwm i Gymru gyrraedd diwedd eu haddysg statudol a phan gaiff y cymwysterau diwygiedig eu dyfarnu am y tro cyntaf. Byddwn yn parhau i weithio gyda phartneriaid ar ôl i'r Fframwaith 14 i 16 gael ei gyflwyno i adolygu manylion sylfaenol ein trefniadau a'n systemau adrodd yn barhaus.

Caiff y cynnig llawn o gymwysterau 14 i 16 diwygiedig ei gyflwyno'n raddol dros sawl blwyddyn. Yn ystod y cyfnod pontio hwn, bydd ein hadroddiadau'n cynnwys hen gymwysterau a'r dyfarniadau newydd.

Rydym yn cydnabod bod rhanddeiliaid yn awyddus i ddeall y trefniadau ar gyfer data a gwybodaeth a fydd ar waith wrth iddynt ymwreiddio'r Cwricwlwm i Gymru a'r Hawl i Ddysgu 14 i 16.

Rydym yn bwriadu cyhoeddi crynodeb o'r ymatebion i'r ymgynghoriad hwn yn ystod haf 2025 ochr yn ochr â datganiad o fwriad ynglŷn â chyflwyno ein dull diwygiedig o ddefnyddio data a gwybodaeth yn y system ysgolion a'r Fframwaith 14 i 16. Bydd hwn hefyd yn cynnwys ein camau nesaf o ran mireinio trefniadau adrodd, datblygu adnoddau a deunyddiau ategol. Byddwn hefyd yn ceisio safbwyntiau ar sut mae data ysgolion a dysgwyr yn cael eu cynnwys mewn cyhoeddiadau ystadegau swyddogol.

Rydym am feithrin dealltwriaeth o effaith bosibl ein cynigion ar ysgolion. Byddwn yn cynnal ‘asesiad o'r effaith ar lwyth gwaith’ a gaiff ei gyhoeddi fel rhan o'r Asesiad Effaith Integredig cyffredinol yn yr haf. I ategu'r gwaith hwn, mae cwestiwn ymgynghori penodol wedi'i gynnwys yn y fersiwn o'r ymgynghoriad hwn sydd wedi'i hanelu at y rhai sy'n gweithio yn y system ysgolion er mwyn casglu safbwyntiau ymarferwyr am oblygiadau cynigion ar lwyth gwaith.

Ein dull cyffredinol o ddefnyddio data a gwybodaeth yn y system ysgolion

Cwestiwn 1: I ba raddau rydych chi'n cytuno bod y dull cyffredinol o ddefnyddio data a gwybodaeth yn y system ysgolion ac egwyddorion yr ecosystem wybodaeth yn cyd-fynd ag ethos ac uchelgeisiau ein Cwricwlwm i Gymru?

Cwestiwn 2: I ba raddau rydych chi'n cytuno bod egwyddorion yr ecosystem wybodaeth yn annog y defnydd o ddata a gwybodaeth i gefnogi'r broses o werthuso a gwella mewn ffordd sy'n sicrhau bod y dysgwr wrth wraidd y broses honno? 

Cwestiwn 3: I ba raddau rydych chi'n cytuno bod egwyddorion yr ecosystem wybodaeth yn fodd i feithrin dealltwriaeth gytbwys a chyfannol o ysgolion a dysgu o'ch safbwynt chi?

Cwestiwn 4: A oes unrhyw egwyddorion neu agweddau eraill sy'n gysylltiedig â'r ecosystem wybodaeth arfaethedig y dylid eu hychwanegu?

Cwestiwn 5: Beth yw eich barn ar egwyddorion yr ecosystem wybodaeth o ran cefnogi dysgwyr unigol a diwallu eu hanghenion amrywiol, gan gynnwys y dysgwyr hynny o gefndiroedd dan anfantais a'r dysgwyr hynny sy'n rhannu nodweddion gwarchodedig (fel y'u nodir yn Neddf Cydraddoldeb 2010)?

Fframwaith Dangosyddion yr Hawl i Ddysgu 14 i 16 (y Fframwaith 14 i 16)

Cwestiwn 6: I ba raddau rydych chi'n cytuno bod Fframwaith Dangosyddion yr Hawl i Ddysgu 14 i 16 (y Fframwaith 14 i 16) yn cyd-fynd â'r Hawl i Ddysgu 14 i 16 gan gefnogi ein huchelgeisiau ehangach fel rhan o'r Cwricwlwm i Gymruar yr un pryd?

Cwestiwn 7: I ba raddau rydych chi'n cytuno bod y Fframwaith 14 i 16 yn cefnogi dealltwriaeth gytbwys o gwricwla 14 i 16 a chyflawniadau dysgwyr yng nghyd-destunau ysgolion eu hunain?

Cwestiwn 8: A ddylai'r fframwaith hwn gynnwys unrhyw ddangosyddion ychwanegol i'ch helpu i ddeall cwricwla 14 i 16 a chyflawniadau dysgwyr mewn ysgol yn llawn? Rhowch fanylion.

Cwestiwn 9: Os yw'n berthnasol, a fydd y Fframwaith 14 i 16 yn rhoi'r wybodaeth sydd ei hangen ar eich sefydliad am gwricwla 14 i 16 a chyflawniadau dysgwyr mewn ysgolion? 

Cwestiwn 10: I ba raddau rydych chi'n cytuno bod y Fframwaith 14 i 16 yn helpu i ganolbwyntio ar nodau cyffredin Cymraeg 2050: Miliwn o siaradwyr?

Cwestiwn 11: Beth yw eich barn ar effaith y Fframwaith 14 i 16 o ran cefnogi dysgwyr unigol a diwallu eu hanghenion amrywiol, gan gynnwys y rhai o gefndiroedd dan anfantais a'r rhai sy'n rhannu nodweddion gwarchodedig (fel y'u nodir yn Neddf Cydraddoldeb 2010)?

Y Gymraeg

Cwestiwn 12: Yn eich barn chi, beth fyddai effeithiau tebygol y dull cyffredinol o ddefnyddio data a gwybodaeth yn y system ysgolion ac effeithiau egwyddorion yr ecosystem wybodaeth ar y Gymraeg? Mae gennym ddiddordeb penodol mewn unrhyw effeithiau tebygol ar gyfleoedd i ddefnyddio'r Gymraeg ac ar beidio â thrin y Gymraeg yn llai ffafriol na'r Saesneg.

Ydych chi'n meddwl bod cyfleoedd i hyrwyddo unrhyw effeithiau cadarnhaol?

Ydych chi'n meddwl bod cyfleoedd i liniaru unrhyw effeithiau negyddol?

Cwestiwn 13: Yn eich barn chi, a fyddai modd ffurfio neu addasu'r dull cyffredinol o ddefnyddio data a gwybodaeth yn y system ysgolion ac egwyddorion yr ecosystem wybodaeth er mwyn sicrhau:

• ei fod yn cael effeithiau positif neu fwy positif ar gyfleoedd i ddefnyddio'r Gymraeg a pheidio â’i thrin yn llai ffafriol na'r Saesneg, neu 
• nad yw’n cael effeithiau andwyol ar gyfleoedd i ddefnyddio’r Gymraeg a pheidio â’i thrin yn llai ffafriol na Saesneg?

Cwestiwn 14: Yn eich barn chi, beth fyddai effeithiau tebygol y Fframwaith 14 i 16 ar y Gymraeg? Mae gennym ddiddordeb penodol mewn unrhyw effeithiau tebygol ar gyfleoedd i ddefnyddio'r Gymraeg ac ar beidio â thrin y Gymraeg yn llai ffafriol na'r Saesneg.

Ydych chi'n meddwl bod cyfleoedd i hyrwyddo unrhyw effeithiau cadarnhaol?

Ydych chi'n meddwl bod cyfleoedd i liniaru unrhyw effeithiau negyddol?

Cwestiwn 15: Yn eich barn chi, a fyddai modd ffurfio neu addasu'r Fframwaith 14 i 16 er mwyn sicrhau:

• ei fod yn cael effeithiau positif neu fwy positif ar ddefnyddio'r Gymraeg ac ar beidio â thrin y Gymraeg yn llai ffafriol na'r Saesneg, neu
• nad yw’n cael effeithiau andwyol ar gyfleoedd i ddefnyddio’r Gymraeg a pheidio â’i thrin yn llai ffafriol na Saesneg?

Defnyddiwch y ffurflen ymateb i'r ymgynghoriad i ymateb i'r cwestiynau uchod.