Cylchlythyr demograffeg Ystadegau Cymru: Mawrth 2026

Ar 28 Ionawr 2026, cyhoeddodd Llywodraeth Cymru yr amcangyfrifon diweddaraf o aelwydydd ar gyfer canol 2024. Roedd hyn yn cynnwys amcangyfrifon ar gyfer canol 2024, yn ogystal ag amcangyfrifon diwygiedig ar gyfer canol 2022 a chanol 2023.

Mae amcangyfrifon aelwydydd yn darparu amcangyfrif nifer yr aelwydydd gan ddefnyddio cyfraddau aelodaeth aelwydydd o'r cyfrifiadau diweddaraf sydd ar gael a'u cymhwyso i amcangyfrifon poblogaeth cyfredol. Mae'r amcangyfrifon diweddaraf o aelwydydd yn seiliedig ar amcangyfrifon poblogaeth y Swyddfa Ystadegau Gwladol (y SYG) ar gyfer canol 2024 (y SYG), a gyhoeddwyd ar 30 Gorffennaf 2025.

Prif bwyntiau

• Rhwng canol 2023 a chanol 2024, cynyddodd amcangyfrif nifer yr aelwydydd tua 10,200 (0.7%) i 1.39 miliwn, yn bennaf oherwydd cynnydd mewn aelwydydd un person a dau berson heb blant.
• Ers canol 2014, mae amcangyfrif nifer yr aelwydydd wedi cynyddu 5.4%.
• Cynyddodd amcangyfrif nifer yr aelwydydd ym mhob awdurdod lleol rhwng canol 2023 a chanol 2024.
• Cynyddodd amcangyfrif nifer y bobl sy’n byw mewn aelwydydd preifat, hynny yw, y boblogaeth nad ydynt yn byw mewn sefydliadau cymunedol, tua 18,900 (0.6%) i 3.13 miliwn rhwng canol 2023 a chanol 2024.
• Yng nghanol 2024, amcangyfrifir mai maint cyfartalog aelwydydd Cymru oedd 2.25 o bobl fesul aelwyd, o gymharu â 2.52 o bobl yng nghanol 1991.

Mae'r data wedi eu cyhoeddi ar wefan newydd StatsCymru. Mae hyn yn cynnwys amcangyfrifon aelwydydd yn ôl awdurdod lleol a math o aelwyd (StatsCymru) yn ogystal ag amcangyfrifon aelwydydd un person yn ôl awdurdod lleol, blwyddyn, oedran a rhyw (StatsCymru).

Yn dilyn cyhoeddi amcanestyniadau poblogaeth awdurdodau lleol sy’n seiliedig ar 2022 ac amcanestyniadau aelwydydd awdurdodau lleol sy’n seiliedig ar 2022 gan Lywodraeth Cymru ar 20 Tachwedd 2025, mae data ychwanegol bellach ar gael ar wefan newydd StatsCymru. Mae hyn yn cynnwys amcanestyniadau poblogaeth aelwydydd preifat sy’n seiliedig ar 2022 yn ôl awdurdod lleol, blwyddyn ac amrywiolyn (StatsCymru), yn ogystal ag amcanestyniadau poblogaeth aelwydydd un person sy’n seiliedig ar 2022 yn ôl awdurdod lleol, oedran, rhyw, blwyddyn ac amrywiolyn (StatsCymru). Yn ogystal, mae cydrannau newid amcanestyniadau poblogaeth sy’n seiliedig ar 2022 yn ôl awdurdod lleol a blwyddyn (StatsCymru) wedi'u cyhoeddi.

Ar 4 Mawrth, cyhoeddodd y SYG ddiweddariad ar ystadegau poblogaeth a mudo (y SYG). Mae hyn yn amlinellu eu gwaith ar welliannau i'r ffordd y maent yn amcangyfrif poblogaeth a mudo, gan roi'r wybodaeth ddiweddaraf am gynlluniau a chynnydd y SYG.

Diweddariad ar amcangyfrifon poblogaeth

Yn dilyn adolygiad o'r amcangyfrifon, bydd y SYG yn parhau i gyhoeddi amcangyfrifon poblogaeth blynyddol swyddogol gan ddefnyddio dulliau sefydledig, gan eu gwella'n raddol wrth iddynt brofi a dilysu'r dulliau hynny. Ni fydd amcangyfrifon poblogaeth sy’n seiliedig ar ddata gweinyddol (ABPEs) yn cael eu cyhoeddi. Gwneir diwygiadau i amcangyfrifon poblogaeth canol 2022, canol 2023 a chanol 2024 i ymgorffori gwelliannau i amcangyfrifon mudo rhyngwladol tymor hir.

Ar 4 Mawrth, cyhoeddodd y SYG Amcangyfrifon poblogaeth yn seiliedig ar ddata gweinyddol: astudiaethau achos awdurdodau lleol, Cymru a Lloegr, canol 2024 (y SYG). Mae'r ymchwil hwn yn dangos canlyniadau cymariaethau rhwng yr amcangyfrifon poblogaeth yn seiliedig ar ddata gweinyddol a'r amcangyfrifon poblogaeth swyddogol canol blwyddyn ar gyfer nifer fach o awdurdodau lleol, gan gynnwys Ceredigion.

Ar 8 Rhagfyr 2025, cyhoeddodd y SYG amcangyfrifon aelwydydd yn seiliedig ar ddata gweinyddol ar gyfer awdurdodau lleol yng Nghymru a Lloegr: 2021. Mae'r ymchwil hon yn darparu amcangyfrifon newydd ar gyfer 2021 o nifer yr aelwydydd sy'n deillio o ffynonellau data gweinyddol ac yn eu cymharu â Chyfrifiad 2021 ac ystadegau swyddogol eraill.

Ar 27 Chwefror, cyhoeddodd y SYG Reason for international migration, international students update: February 2026 (y SYG). Edrychodd yr erthygl ar statws mewnfudo myfyrwyr rhyngwladol yn y Deyrnas Unedig dros amser gan ddefnyddio amcangyfrifon a ddarparwyd yn y bwletin mudo rhyngwladol tymor hir.

Ar 4 Mawrth, cyhoeddodd y SYG gynlluniau ar gyfer Prawf Cyfrifiad yn 2027, gyda Chaerdydd a Sir Fynwy wedi'u dewis fel ardaloedd prawf yng Nghymru. Cyhoeddodd y SYG ei strategaeth Cyfrifiad 2031 (y SYG) hefyd, gan roi darlun clir o bwrpas a chwmpas y cyfrifiad.

I gael gwybodaeth am ystadegau am y Gymraeg, gweler diweddariad chwarterol Ystadegau Cymru.

Rhif ffôn: 0300 025 0373

E-bost: ystadegau.poblogaeth@llyw.cymru

Cyfryngau: 0300 025 8099