Cofrestru llety ymwelwyr: trosolwg 

O fis Hydref 2026 ymlaen, os ydych chi'n cymryd archebion am arosiadau dros nos yng Nghymru bydd gofyniad cyfreithiol i chi gofrestru gydag Awdurdod Cyllid Cymru (ACC).

Rhaid i chi gofrestru erbyn 31 Mawrth 2027, hyd yn oed os nad yw'ch cyngor lleol yn dewis cyflwyno Ardoll Ymwelwyr.

Gallwch gofrestru yn rhad ac am ddim, a bydd yn:

• helpu ymwelwyr yn i ddod o hyd i lety cofrestredig
• darparu data i gefnogi twristiaeth yng Nghymru
• eich helpu i gasglu a thalu'r Ardoll Ymwelwyr (os fydd eich cyngor lleol yn ei chyflwyno)

Gallwch gofrestru i gael diweddariadau am gofrestru ac am yr Ardoll Ymwelwyr.  

Y darparwr llety ymwelwyr sy’n gyfrifol am gofrestru. 

Rhaid i chi gofrestru os yw'r canlynol yn berthnasol: 

• rydych yn cymryd archebion ar gyfer llety dros nos mewn llety ymwelwyr yng Nghymru (boed hynny am un noson, yn dymhorol neu drwy gydol y flwyddyn) 
• chi sy’n gyfrifol am y llety (er enghraifft, rydych chi’n berchen arno neu'n ei rentu) 
• mae unrhyw archebion rydych yn eu cymryd am 31 noson neu lai

Mae mathau o lety’n cynnwys:

• llety hunanarlwyo (fel bythynnod, tai, fflatiau neu gabannau) 
• eich prif gartref neu ystafelloedd sbâr 
• gwestai, gwely a brecwast neu dai llety 
• lleiniau ar gyfer pebyll, carafannau teithiol, cartrefi modur neu faniau gwersylla 
• glampio (fel cytiau bugail, yurtiau, podiau neu debyg) 
• carafannau sefydlog neu gartrefi symudol 
• hosteli neu dai bync

Enghraifft: os ydych yn cymryd archebion ar gyfer eich carafán 

Mae gan Sioned garafán statig y mae'n ei defnyddio am 10 mis o'r flwyddyn. 

Yn ystod yr haf, mae hi'n cymryd archebion gan ymwelwyr i aros yn y garafán. Mae rhai o'r archebion ar gyfer 31 noson neu lai. Rhaid iddi gofrestru ei charafán statig fel llety ymwelwyr. 

Enghraifft: os ydych yn cymryd archebion ar gyfer eich prif gartref 

Mae Rhiannon yn hysbysebu ei phrif gartref ar Airbnb unwaith y flwyddyn ar gyfer digwyddiad yn ei hardal leol. Oherwydd bod hwn yn archeb am 31 noson neu lai, rhaid iddi gofrestru ei phrif gartref fel llety ymwelwyr.

Os ydych chi'n defnyddio asiant neu gwmni rheoli 

Nid yw asiantau na chwmnïau rheoli yn gyfrifol am gofrestru, ond gallant gofrestru ar eich rhan.  

Rhaid i chi gofrestru o fis Hydref 2026.  

Bydd angen i chi fewngofnodi gan ddefnyddio One Login GOV.UK. Gallwch greu One Login GOV.UK cyn i chi gofrestru. 

Pan fyddwch chi'n cofrestru, bydd angen i chi ddarparu:  

• manylion cyswllt, er enghraifft: 
  • enw 
  • cyfeiriad 
  • rhif ffôn 
  • cyfeiriad e-bost 
• dyddiad geni 
• cwmni neu rif elusen (os yn berthnasol) 
• enw masnachu (os yn berthnasol) 
• mathau o lety rydych yn eu cynnig  
• enw a chyfeiriad yr eiddo lle mae'r llety 
• pryd mae’r llety ar agor ar gyfer archebion fel arfer 
• nifer yr unedau y gellir eu harchebu 
• y nifer mwyaf o bobl sy'n gallu aros 

Os oes gennych fwy nag un lleoliad neu safle 

Os yw’r un bobl neu sefydliadau yn gyfrifol am bob lleoliad neu safle, rhaid i chi gynnwys pob lleoliad neu safle mewn un cofrestriad. 

Os yw gwahanol bobl neu sefydliadau yn gyfrifol am wahanol leoliadau, rhaid i chi eu cofrestru ar wahân.

Nid oes rhaid i chi gofrestru os: 

• nad ydych yn cymryd archebion ar gyfer y llety (er enghraifft, ffrindiau neu deulu yn aros am ddim) 
• nad ydych bellach yn cymryd archebion ar gyfer arosiadau dros nos 

Ar ôl cofrestru, byddwch yn cael rhif cofrestru unigryw.  

Gallwch ddefnyddio'r rhif hwn i: 

• ddangos bod eich llety wedi'i gofrestru 
• cysylltu ag ACC i drafod eich cofrestriad 

Pa wybodaeth fydd ar y gofrestr gyhoeddus 

Ni fyddwn yn cyhoeddi dyddiadau geni, rhifau ffôn na chyfeiriadau e-bost. 

Gwybodaeth am y darparwr llety  

Byddwn yn cyhoeddi: 

• rhif cofrestru 
• cwmni neu rif elusen (os yn berthnasol) 
• enw masnachu (os yn berthnasol) 
• enw'r darparwr llety 
  • ar gyfer unigolion, dim ond os yw'r enw yn rhan o enw masnachu y caiff ei gyhoeddi 
• cyfeiriad y darparwr llety 
  • ar gyfer unigolion, dim ond os mai'r llety yw eu hunig neu eu prif breswylfa y caiff ei gyhoeddi 

Gwybodaeth am y llety

Byddwn yn cyhoeddi:

• enw a chyfeiriad yr eiddo lle mae'r llety
• mathau o lety a gynigir
• pryd mae’r llety ar agor ar gyfer archebion fel arfer
• y nifer mwyaf o bobl sy'n gallu aros
• nifer yr unedau y gellir eu harchebu

Byddwch yn gallu chwilio am lety gan ddefnyddio cod post neu rif cofrestru. 

Pryd i ddiweddaru eich manylion 

Rhaid i chi ddiweddaru eich manylion cofrestru o fewn 30 diwrnod os bydd unrhyw beth yn newid.

Mae hyn yn cynnwys:

• gwerthu’r llety 
• nad ydych bellach yn cymryd archebion ar gyfer arosiadau dros nos 
• newidiadau:
  • i’r manylion cyswllt
  • i fanylion y llety
  • i bwy sy'n gyfrifol am y llety ymwelwyr

Byddwch yn gallu diweddaru'ch manylion gan ddefnyddio'r gwasanaeth cofrestru ar-lein. 

Os na fyddwch yn cofrestru erbyn 31 Mawrth 2027, efallai y bydd yn rhaid i chi dalu cosb.

Y gosb gyntaf yw £100 am bob safle neu leoliad. Os nad ydych yn cofrestru hyd yn oed ar ôl i ACC gysylltu â chi, gall y dirwyon gynyddu i gyfanswm o £1,400 fesul lleoliad neu safle.

Os cewch gosb, gallwch ofyn am adolygiad neu apêl. Mae canllawiau pellach ar gosbau yn cael eu paratoi.

Mae cofrestriad llety ymwelwyr: 

• yn dechrau ym mis Hydref 2026 
• yn berthnasol i bob darparwr llety ymwelwyr 
• yn berthnasol hyd yn oed os nad yw'r cyngor lleol yn cyflwyno'r Ardoll Ymwelwyr  

Bydd yr Ardoll Ymwelwyr: 

• ond yn berthnasol i ardaloedd lle mae'r cyngor lleol yn ei chyflwyno 
• yn dechrau o 1 Ebrill 2027 ar y cynharaf 

Gwiriwch os yw eich cyngor lleol yn codi’r Ardoll Ymwelwyr neu ddarllenwch drosolwg o'r Ardoll Ymwelwyr.  

Mae trwyddedu llety ymwelwyr: 

• yn ffordd o ddangos bod llety yn bodloni safonau penodol 
• yn cael ei gynllunio 

Nid oes angen trwyddedu llety ymwelwyr ar hyn o bryd.

Darganfyddwch fwy am gynlluniau ar gyfer trwyddedu llety ymwelwyr.  

I gael cymorth gyda chofrestru llety ymwelwyr, cysylltwch ag Awdurdod Cyllid Cymru.  

Rydym yn cynnal sesiynau ymchwil defnyddwyr gyda darparwyr llety i helpu i wella'r gwasanaeth cofrestru.

Cofrestrwch i gymryd rhan mewn ymchwil defnyddwyr.