Cymorth a chyngor ariannol i’ch helpu gyda’ch costau tai.
Cynnwys
Tenantiaid
Os ydych yn credu y byddwch yn cael trafferth talu'ch rhent, dylech gysylltu â'ch landlord cyn gynted â phosibl. Os byddwch yn cysylltu, efallai y byddan nhw'n gallu eich helpu.
O dan rai amgylchiadau, efallai y bydd gennych hawl i gael cymorth gyda'ch costau tai.
Taliadau Disgresiwn at Gostau Tai
Mae Taliadau Disgresiwn at Gostau Tai ar gael i denantiaid y sector cymdeithasol a’r sector preifat.
Mae Taliadau Disgresiwn at Gostau Tai yn darparu arian yn ychwanegol at unrhyw fudd-daliadau a gewch.
Mae'n bosib y cewch y cymorth hwn os yw eich awdurdod lleol yn penderfynu bod angen cymorth ychwanegol arnoch i dalu eich costau tai.
I fod yn gymwys am Daliad Disgresiwn at Gostau Tai, rhaid i chi fod yn derbyn un o'r budd-daliadau canlynol:
- yr hen gynllun Budd-dal Tai
- yr elfen o gyfraniad costau tai drwy’r Credyd Cynhwysol
I wneud cais am Daliad Disgresiwn at Gostau Tai, cysylltwch â'ch awdurdod lleol.
Perchnogion tai
Os ydych yn meddwl y byddwch yn cael trafferth talu eich morgais, dylech gysylltu â'ch benthycwr cyn gynted â phosibl. Os byddwch yn cysylltu, efallai y byddan nhw'n gallu eich helpu.
Cymorth i Aros – Cymru
Os ydych yn berchennog tŷ, efallai y gallwch gael cymorth gan gynllun Cymorth i Aros – Cymru.
Gall y cynllun roi benthyciad ecwiti a rennir i ymgeiswyr cymwys er mwyn helpu i leihau eu taliadau morgais i lefel fforddiadwy.
Dysgwch fwy am Help i Aros – Cymru.
Cymorth ar gyfer llog ar forgais
Os ydych yn berchennog tŷ, efallai y byddwch yn gallu cael help tuag at daliadau llog ar:
- eich morgais
- benthyciadau rydych chi wedi eu cymryd ar gyfer rhai atgyweiriadau a gwelliannau i'ch cartref
Gelwir yr help hwn yn Gymorth ar gyfer Llog ar Forgais.
Ceir rhagor o wybodaeth am Gymorth ar gyfer Llog Morgais ar GOV.UK
Cymorth arall ar gyfer costau tai
Os nad ydych yn derbyn budd-dal tai neu'r elfen cyfraniad costau tai drwy’r Credyd Cynhwysol, ond eich bod o oedran gweithio, ar incwm isel ac yn cael trafferth gyda chostau sy'n gysylltiedig â thai, efallai y bydd eich awdurdod lleol yn gallu helpu i'ch atal rhag dod yn ddigartref.
I gael gwybod mwy am y cymorth y gallech fod yn gymwys i'w gael, cysylltwch â’ch awdurdod lleol.