Yn y canllaw hwn
4. Gwybod faint rydych chi'n ei dalu
Mae’r Ardoll Ymwelwyr yn cael ei chodi ar ddwy gyfradd. Mae’r rhain yn berthnasol pan fydd ymwelwyr yn aros dros nos mewn llety ymwelwyr.
Cyfradd is yr ardoll
75 ceiniog y pen y noson ar gyfer:
- ystafelloedd i’w rhannu mewn hosteli, tai bync, bothies neu ystafelloedd cysgu
- lleiniau ar gyfer pebyll (gan gynnwys y rhai dros dro ar gyfer digwyddiadau a gwyliau)
Cyfradd uwch yr ardoll
£1.30 y pen y noson ar gyfer pob math arall o lety i ymwelwyr, er enghraifft:
- gwestai, gwely a brecwast a thai llety
- llety hunanarlwyo, gan gynnwys:
- cabanau
- chalets
- bythynnod
- tai gosod
- parciau carafannau
- cytiau bugail
- safleoedd glampio
- cartrefi (megis Airbnb)
- lleiniau ar gyfer carafannau, cartrefi modur neu faniau gwersylla
- llety dros dro ar gyfer digwyddiadau (megis podiau glampio ar gyfer gwyliau)
A yw ymwelwyr yn gallu cael ad-daliadau?
Gall ymwelwyr wneud cais am ad-daliad gan Awdurdod Cyllid Cymru ar ôl eu harhosiad os nhw’n:
- aros fel gofalwr sy'n gofalu am berson anabl
- digartref dros dro yn ystod cyfnod yr arhosiad
- ffoi rhag niwed neu drais domestig
Bydd Awdurdod Cyllid Cymru yn cyhoeddi rhagor o ganllawiau am ad-daliadau ymwelwyr cyn Ebrill 2027.
Arhosiadau pan na fyddwch yn talu'r ardoll
Nid ydych yn talu Ardoll Ymwelwyr am:
- arhosiad o 32 noson neu fwy a wneir mewn un archeb
- rhywun o dan 18 oed yn aros mewn llety sy'n talu’r gyfradd is
- llety wedi’i ddarparu gan gyngor lleol i fod yn lety dros dro
- archebion neu arosiadau sy’n cael eu canslo neu rai pan nad yw’r ymwelwyr yn dod
Gweithwyr, contractwyr neu brentisiaid sy’n aros dros nos
Nid oes angen i chi dalu'r ardoll pan fydd eich gweithwyr, eich contractwyr neu eich prentisiaid yn aros dros nos. Ond, dim ond os ydyn nhw’n aros yn eich llety fel rhan o'u swydd. Er enghraifft, staff sy'n gofalu am eich llety pan fydd ymwelwyr yn aros yno. Neu os bydd eich gweithwyr yn aros dros nos i fynd i gyfarfodydd busnes neu ddigwyddiadau gyda'r nos.
Cymhwyso TAW
Byddwch yn talu:
- Ardoll Ymwelwyr i Awdurdod Cyllid Cymru
- Treth ar Werth (TAW) i CThEM
Os ydych chi wedi’ch cofrestru ar gyfer TAW
Mae Treth Ar Werth (TAW) yn berthnasol i'r cyfanswm y mae ymwelwyr yn ei dalu am eu harhosiad. Mae hyn yn cynnwys yr Ardoll Ymwelwyr os byddwch yn penderfynu ei throsglwyddo i'ch ymwelwyr.
Os ydych yn fusnes sydd wedi'i gofrestru ar gyfer TAW, bydd angen i chi gyfrifo am y TAW ar yr ardoll a'i thalu i Gyllid a Thollau EF (CThEF).
Os nad ydych wedi’ch cofrestru ar gyfer TAW
Ni fydd TAW yn berthnasol os nad ydych wedi’ch cofrestru ar gyfer TAW.
Ond os byddwch yn penderfynu codi eich prisiau er mwyn talu cost yr ardoll, bydd yr incwm ychwanegol yn cyfrif tuag at eich trosiant trethadwy at ddibenion TAW.
Efallai y bydd angen i chi gofrestru ar gyfer TAW os yw eich trosiant trethadwy yn mynd uwchlaw'r trothwy TAW. Gallwch gael cyngor ar TAW gan Gyllid a Thollau EF neu'ch cyfrifydd.