Yn y canllaw hwn
6. Cyfrifo eich ardoll yn gywir
Rhaid i chi dalu'r ardoll fesul person, fesul noson.
Mae hyn yn cael ei alw’n arosiadau dros nos hefyd.
Sut i gyfrifo swm yr ardoll
Rhaid i chi ddilyn 2 gam i gyfrifo eich ardoll.
Cam 1: Cyfrifo faint sy'n ddyledus fesul arhosiad
Er enghraifft, pe bai 10 arhosiad y mae'n rhaid i chi dalu'r ardoll arnyn nhw.
Yn gyntaf, rhaid i chi gyfrifo faint o ardoll sy’n ddyledus ar gyfer pob un o'r 10 arhosiad.
Pe bai 4 oedolyn wedi aros am 7 noson ar gyfer eich archeb cyntaf.
Lluoswch:
- nifer y personau gyda
- nifer y nosweithiau gyda
- eich cyfradd ardoll
Er enghraifft, os ydych chi'n talu:
- y gyfradd uwch, cyfrifwch 4 person × 7 noson × £1.30 = £36.40 o ardoll
- y gyfradd is, cyfrifwch 4 person × 7 noson × £0.75 = £21 o ardoll
Gwnewch hyn ar gyfer y 9 arhosiad sy'n weddill.
Cam 2: Ychwanegwch pob swm at ei gilydd
Ychwanegwch yr holl symiau ardoll o'r 10 arhosiad at ei gilydd.
Dyma fydd cyfanswm yr ardoll y mae'n rhaid i chi ei dalu.
Enghraifft o symiau'r ardoll mewn taenlen
Dyma enghraifft o ddefnyddio taenlen i gyfrifo ardoll os ydych chi'n talu'r gyfradd ardoll uwch:
| Arosiadau | Nifer y gwesteion | Nifer y nosweithiau | Cyfradd yr ardoll | Ardoll ar yr arhosiad |
|---|---|---|---|---|
| Arhosiad 1 | 4 | 7 | £1.30 | £36.40 |
| Arhosiad 2 | 2 | 4 | £1.30 | £10.40 |
| Arhosiad 3 | 4 | 5 | £1.30 | £26.00 |
| Arhosiad 4 | 1 | 3 | £1.30 | £3.90 |
| Arhosiad 5 | 3 | 7 | £1.30 | £27.30 |
| Arhosiad 6 | 4 | 7 | £1.30 | £36.40 |
| Arhosiad 7 | 2 | 3 | £1.30 | £7.80 |
| Arhosiad 8 | 3 | 5 | £1.30 | £19.50 |
| Arhosiad 9 | 4 | 5 | £1.30 | £26.00 |
| Arhosiad 10 | 4 | 7 | £1.30 | £36.40 |
| Cyfanswm yr ardoll i'w thalu | £230.10 | |||
Peidiwch â defnyddio cyfanswm y nosweithiau a'r gwesteion pan fyddwch yn cyfrifo eich ardoll. Bydd swm yr ardoll yn anghywir ac yn uwch. Er enghraifft, cyfanswm o 31 o westeion × cyfanswm o 53 noson × £1.30 = £2,135.90 yn hytrach na £230.10 o ardoll i'w dalu!
Cyfrifo’r ardoll ar y gyfradd is
Tynnwch blant o dan 18 oed o’r hafaliad pan fyddwch chi'n cyfrifo’r ardoll ar y gyfradd is.
Er enghraifft, pe bai teulu o 5 yn aros 3 noson mewn pabell ar eich safle gwersylla. Mae 3 o’r teulu yn blant o dan 18 oed.
- Rhaid i chi dynnu’r 3 phlentyn oddi ar eich cyfanswm o 5 gwestai: 5 gwestai − 3 phlentyn = 2 westai rydych chi'n talu'r ardoll arnynt.
- Mae hyn yn golygu bod yn rhaid i chi dalu'r ardoll ar gyfer 2 westai sy'n aros am 3 noson: 2 westai × 3 noson × £0.75 = £4.50 o ardoll i'w thalu.
Defnyddio arosiadau dros nos i gyfrifo'r ardoll
Os ydych chi'n defnyddio arosiadau dros nos i gyfrif yr ardoll, cofiwch:
- gyfrifo nhw fesul arhosiad neu fesul dydd
- defnyddio'r gyfradd ardoll iawn