Arolwg Sgiliau Cyflogwyr: 2019

Mae’r Arolwg Sgiliau Cyflogwyr (ESS) yn ffynhonnell ddiffiniol o wybodaeth i ddeall yr heriau o ran sgiliau y mae cyflogwyr yn eu hwynebu, mewn perthynas â’u gweithlu presennol ac wrth recriwtio, a sut maen nhw’n ymateb i’r heriau hyn drwy fuddsoddi mewn hyfforddi a datblygu’r gweithlu.

Gyda 6,773 o weithwyr yn cymryd rhan yn arolwg 2019 ledled Cymru (a gyda 81,013 o gyfweliadau ledled Cymru, Lloegr a Gogledd Iwerddon ar y cyd), mae’n un o arolygon busnes mwyaf y byd.

Gwnaethpwyd gwaith maes yr arolwg ar gyfer y don ddiweddaraf rhwng misoedd Mehefin a Rhagfyr 2019. Er bod y canfyddiadau’n dal i fod yn ffynhonnell bwysig o wybodaeth am y farchnad lafur, mae cyrhaeddiad Covid-19 yn fuan yn 2020 yn golygu bod y dirwedd economaidd wedi newid yn sylweddol ers gwneud gwaith maes yr arolwg.

Prif ganfyddiadau

• Roedd gan un ymhob ugain o gyflogwyr yng Nghymru o leiaf un swydd wag lle’r oedd prinder sgiliau ar amser yr arolwg (5%), oedd yn cyfateb â’r 6% yn 2017.
• Yn gyffredinol, roedd 13% o gyflogwyr wedi dweud bod bwlch sgiliau o fewn eu gweithlu, oedd heb newid ers 2017.
• Roedd oddeutu dwy ran o dair o sefydliadau yng Nghymru’n disgwyl y byddai angen iddynt uwchsgilio eu gweithlu dros y 12 mis nesaf (68%).
• Dywedodd oddeutu traean o gyflogwyr yng Nghymru bod ganddynt weithwyr gyda chymwysterau a sgiliau oedd yn fwy datblygedig nag oedd ei angen ar gyfer rôl eu swydd gyfredol (34%).
• Roedd ychydig dros dair rhan o bump o gyflogwyr yng Nghymru (62%) wedi ariannu neu drefnu hyfforddiant i’w staff dros y 12 mis blaenorol, yn debyg i lefelau a welwyd drwy’r gyfres Arolwg Sgiliau Cyflogwyr gyfan a gychwynnodd yn 2011 (62% i 63%).
• Roedd gan un mewn deg (10%) o gyflogwyr brentisiaid ar eu safleoedd ar adeg y cyfweliad ac roedd 6% pellach wedi cynnig prentisiaethau ond heb fod â rhai ar y pryd, gan gynrychioli cyfran debyg oedd yn cynnig prentisiaethau â 2016 (15%) ond cynnydd ers 2014 (13%).